Otyrysqa QHA tóraǵasynyń orynbasary – Prezıdent Ákimshiligi QHA hatshylyǵynyń meńgerýshisi Marat Ázilhanov, Parlament depýtattary, Mádenıet jáne aqparat vıse-mınıstri Evgenıı Kochetov, QHA tóraǵasynyń orynbasarlary Lýgmar Býlarov, Iýrıı Shın, Qazaqstan halqy Assambleıasy keńesiniń músheleri, respýblıkalyq etnomádenı birlestikter men qoǵamdyq qurylymdardyń ókilderi qatysty.
– 30 jyl – az ǵana ýaqyt emes. Assambleıa alǵash qurylǵan sátten bastap, negizgi mindetteri aıqyndalyp, qoǵamdaǵy etnosaralyq kelisim men birlikti qalyptastyrýda, odan ári nyǵaıtýda, ártúrli etnos ókilderiniń múddelerin qorǵap, olardyń tól mádenı qundylyqtarynyń saqtalýyna ózindik úles qosyp keledi. Sondyqtan mereıli datany toılaýda jaı ǵana merekelik jıyndar saryny emes, aıryqsha mán-mańyzǵa ıe is-sharalar ótkiziledi. Jyl basynan beri alǵashqy kezeńin aıaqtadyq desek bolady, ıaǵnı qańtar, aqpan jáne naýryz aıynyń bir bóligin, ıaǵnı 3 myńǵa jýyǵyn biz aqparattyq-túsindirý sıpatyndaǵy is-sharalarǵa arnadyq. Túrli taqyryptaǵy materıaldar jarııalandy. Al jalpy, úsh aıda barlyq jobanyń qorytyndysy boıynsha 15 myńnan asa is-shara uıymdastyrylypty. Atqarylǵan jumystar úshin men keńes múshelerine erekshe alǵysymdy bildiremin. Bul jumystardy ári qaraı da belsendi, júıeli jalǵastyrýymyz kerek, – dedi M.Ázilhanov.
Keńeste L.Býlarov pen Iý.Shın de QHA-nyń qoǵamdyq orynbasarlary retinde atqarǵan jumystaryna esep berdi. Al E.Kochetov Memleket basshysynyń Qazaqstan halqy Assambleıasynyń HHHIII sessııasynda bergen tapsyrmalaryn Mádenıet jáne aqparat mınıstrligi, basqa da memlekettik organdar men qoǵamdyq uıymdardyń oryndaýy týraly baıandady.
– Jalpy, QHA tóraǵasyna 23 tapsyrma berildi, olardyń 17-i – ortalyq memlekettik organdarǵa, altaýy jergilikti atqarýshy organdarǵa júkteldi. Atalǵan tapsyrmalardyń ishinde Mádenıet jáne aqparat mınıstrligine 12 tapsyrma berilgen. Barlyq tapsyrma merziminde oryndaldy. Qoıylǵan maqsattarǵa qol jetkizý úshin mınıstrlik memlekettik organdarmen, qoǵamdyq uıym ókilderimen birge qoǵamdyq kelisimdi nyǵaıtý, azamattyq belsendilikti damytý jáne etnosaralyq dıalogti qoldaý baǵytynda keshendi sharalardy júzege asyrdy. Ortalyq jáne jergilikti atqarýshy organdarmen, qoǵamdyq ınstıtýttarmen birlesip, QHA-nyń 30 jyldyǵyn atap ótýge arnalǵan is-sharalar jospary ázirlendi. 400 aýqymdy is-shara, 5 myń áleýmettik mańyzy bar joba, ımıdjdik bastamalar bar. Jospar boıynsha 1,5 mln-nan asa adamdy qamtý kózdelip otyr. Qazirgi ýaqytta assambleıanyń 13 arnaıy jobasy, 34 jol kartasy júzege asyrylyp jatyr, – dedi E.Kochetov.
Sondaı-aq bes áleýmettik keselmen kúres – nashaqorlyq, qumar oıyndarǵa táýeldilik, otbasyndaǵy jáne qoǵamdaǵy zorlyq-zombylyq, vandalızm jáne ysyrapshyldyq týrasynda 6 myńnan asa túrli formattaǵy is-sharalar ótkizilip, taqyryptyq aksııalar da uıymdastyrylypty. Patrıotızm, mádenıetke degen súıispenshilikti nasıhattaý, jalpyulttyq birlikti jáne kelisimdi nyǵaıtýǵa yqpal etý maqsatynda elimizdiń teatrlarynda otandyq avtorlardyń shyǵarmalary boıynsha 1 744 spektakl qoıylǵan.
Buǵan qosa Qazaqstannyń 20 óńirinde assambleıanyń hatshylyǵymen birlesip, QHA-men ózara árekettesetin depýtattyq toptar quryldy. QHA qoǵamdyq qurylymdarynyń mádenı birlestikteri jetekshileriniń orynbasarlary retinde jastardy kandıdatýrasy qaralǵan. Nátıjesinde, tóraǵalardyń orynbasarlary retinde 14 respýblıkalyq jáne 243 óńirlik etnomádenı birlestikterdiń belsendi jastary taǵaıyndaldy.
Búginde respýblıka kóleminde 32 Dostyq úıi jumys isteıdi. Olar jergilikti turǵyndar úshin komıýnıtı-ortalyq retinde óz qyzmetiniń aıasyn keńeıtti. Osylaısha, Dostyq úılerinde 2 700-den asa is-shara ótkizilip, oǵan shamamen 300 myń adam qatysqan.
Jıyn sońynda keńes músheleri Qazaqstan halqy Assambleıasynyń jáne QHA keńesiniń jańartylǵan quramyn qarastyryp, QHA Analar keńesiniń Úlgilik erejesin bekitti.
