Kúni búginge deıin Ulytaý oblysyndaǵy naýqastar kúrdeli operasııa jasatýǵa Qaraǵandy, Astana qalalaryna sabylatyn. Oblys qaıta ashylǵannan beri dárigerler jergilikti halyqty ózderi emdeýge áreket etip jatyr. Buryn-sońdy mundaı operasııa elimizdiń iri qalalarynda jasalatyn, naýqastar kezegin uzaq kútetin. Endi endoprotezdeý ulytaýlyqtarǵa alysqa barmaı-aq, Jezqazǵan qalasyndaǵy áleýmettik medısınalyq saqtandyrý qoryna qarasty «Jezqazǵan medısınalyq ortalyǵy» JShS bazasynda qoljetimdi.
Buryn mundaı operasııa kommersııalyq negizde jasalatyn. Jezqazǵan medısınalyq ortalyǵynyń travmatologııa bólimshesiniń travmatolog-ortopedi Erǵanat Shahatov MÁMS sheńberinde jasalǵan alǵashqy operasııanyń qalaı ótkeni týraly: «Bizge operasııa jasaýda tájirıbesin bólisýge elordadaǵy «Alanda» klınıkasynan joǵary dárejeli travmatolog-ortoped, Astana medısına ýnıversıtetiniń ǵalymy Birjan Qaıyrbekuly arnaıy keldi. Sonymen qatar operasııaǵa ekinshi dárejeli travmatolog-ortoped Jasulan Shalabaev qatysty. Eki kúnniń ishinde 3 jambas, 3 tize býynyn aýystyrdyq. Dálirek aıtqanda, alty adamǵa operasııa jasaldy. Kúrdeli operasııany ózimiz birden jasap ketemiz dep aıta almaımyn. Ázirge tájirıbesi mol tálimgerdiń kómegi qajet. Aldaǵy ýaqytta bilimimizdi tereńdetip, alǵan tájirıbemizdi jetildire beremiz», dep málimdedi.
Jalpy, operasııalardyń quny 2 mln teńgeden asady. Operasııaǵa deıin naýqastar túgeldeı tekseristen ótedi. Asqazanda jara, júrekte aqaý bolmaýy kerek.
Keń ári jaryq bólmede jatqan emdelýshilerdiń qabaǵy ashyq. Aıaǵyn basa almaı, aýrýy janyna batqan Raýshan Muratqyzy Qaraǵandyǵa baryp, emdelmek bolǵan eken. Sátbaev qalasyndaǵy emhanadan travmatologtiń joldamasyn alyp, operasııaǵa deıingi búkil medısınalyq tekserýden tegin ótken. Qarajal qalasynyń turǵyny Leıla Shýbaeva da MÁMS qarajaty negizinde operasııany tegin jasatyp, aıaǵyn basyp júre alatyn jaǵdaıǵa jetti. Operasııa jasatqan jandar 7-8 kún emdelip bolǵan soń ózderi turatyn jergilikti emhana dárigeriniń baqylaýyna kóshedi. Mazalaǵan suraqtary bolsa kez kelgen ýaqytta ózderine operasııa jasaǵan dárigerge kelip, keńes ala alady.
Ulytaý oblysy
