MQIA baspasóz qyzmetiniń jazýynsha, amerıkadaǵy memlekettik basqarý salasyndaǵy jetekshi kásibı qaýymdastyqtyń uıymdastyrýymen ótken is-shara – adamı kapıtaldy damytý jáne jasandy ıntellektini qoldaný salasyndaǵy úzdik tájirıbemen almasýǵa múmkindik berdi.
Paneldik sessııada sóz sóılegen Darhan Jazyqbaı Prezıdent Qasym-Jomart Toqaevtyń otandyq memlekettik qyzmet júıesin jańǵyrtý boıynsha alǵa qoıǵan mindetterine sáıkes júzege asyrylǵan aýqymdy ózgeristerge jáne bastamalarǵa toqtaldy. Ol memlekettik qyzmetti bıýrokratııadan aryltý, personaldy basqarýda zamanaýı HR quraldaryn engizý jáne memlekettik apparattyń servıstik modelin qalyptastyrý baǵytyndaǵy sharalardy atap ótti. Sondaı-aq jańa basqarýshylyq mádenıetti qalyptastyrýdaǵy mańyzdy jobalar – Prezıdenttik jastar jáne óńirlik kadr rezervterin qurý tájirıbesimen bólisti.
Agenttik tóraǵasy zaman talaptaryna saı memlekettik apparattaǵy adam resýrstaryn basqarýdyń barlyq prosessteri jáne memlekettik qyzmetke kadrlardy irikteý otandyq «eQyzmet» júıesinde tolyǵymen avtomattandyrylǵanyna nazar aýdardy. Aldaǵy ýaqytta jasandy ıntellekt múmkindikterin qoldaný zerdelenip jatqandyǵy atap ótildi.
Qoldanystaǵy júıeni ınstıtýsıonaldy túrde qaıta qaraýdy kózdeıtin QR Memlekettik qyzmetin damytýdyń 2024-2029 jyldarǵa arnalǵan tujyrymdamasy bekitilgeni aıtyldy. Tujyrymdama aıasynda memlekettik qyzmettiń gıbrıdti modeli engizilip, qyzmetshilerdiń kóldeneń mansaptyq ósýine jáne eńbekaqy deńgeıin arttyrýǵa múmkindik jasalady. Jastardy memlekettik qyzmetke tartý jáne daıarlaý úshin erte kásiptik baǵdarlaý ınstıtýtyn qurý josparlanýda.
«Memlekettik qyzmetti damytý Prezıdenttiń «memleket adam úshin» qaǵıdatyna negizdelgen. Qazaqstan jahandyq ózgeristerdi eskere otyryp, ózindik progressıvti damý jolyn ustanyp keledi. Biz memlekettik qyzmettiń zamanaýı talaptaryn eskere otyryp, ınnovasııalardy engizýge jáne qol jetkizgen jetistikterimizdi odan ári jetildirýge múddelimiz», dedi Darhan Jazyqbaı.
Sheteldik áriptester Qazaqstannyń memlekettik qyzmetti jetildirý, sıfrlyq tehnologııalardy engizý tájirıbesine qyzyǵýshylyq tanytty.
6 baǵyt pen 150 sessııany qamtyǵan konferensııada basty nazar tehnologııalyq ózgerister men jańa sıfrlyq quraldardyń úzdiksiz damýy jaǵdaıynda «qoǵamǵa qyzmet etý» tásilderin qaıta qarastyrý, jasandy ıntellektini tıimdi paıdalaný, ony baqylaý jáne qoǵam ıgiligine jaratý, sondaı-aq osy salalardaǵy yntymaqtastyqty kúsheıtý máselelerine aýdaryldy.
