Foto: informburo.kz
Depýtattyń aıtýynsha, Semeıde qoǵamdyq kólikter jetkiliksiz, basym bóligi tozǵan, ýaqytynda kelmeıdi, keshke durys júrmeıdi.
«Semeı qalasynda qoǵamdyq kólik tasymalymen aınalysatyn 5 kompanııaǵa («AvtoTransSemeı»JShS, «Semavtopark» JShS, «Taksomotornyı park» JShS, «EcoBus QK» JShS, «Pınchýk G.V.» JK ) 2022-2024 jyldary bıýdjetten 18,7 mlrd teńge sýbsıdııa bólingen. Alaıda bul máseleni tolyq sheshken joq. Qalalyq marshrýttarǵa qyzmet kórsetetin 424 avtobýstyń 307-si (72%-y) eski. Sonymen qatar, Semeı qalasyndaǵy joldar men kóshelerdi jóndeý, kópir salý máselelerin sheshýdi turǵyndar talap etip jatyr», dedi N.Sabılıanov.
Májilismen óńirdegi áleýmettik osal toptaǵy azamattardy, kóp balaly analar men jetimderdi baspanamen qamtý ózekti bolyp otyrǵanyn atap ótti.
«Abaı oblysy boıynsha 20 600 adam, onyń ishinde Semeı qalasy boıynsha 14 600 adam turǵyn úı kezeginde tur. Olardyń qatarynda áleýmettik jaǵynan osal toptarǵa jatatyndar, kópbalaly analar, jetim balalar, kóp jyldar kezekte turǵan azamattar bar. Buǵan qomaqty qarajat qajet», dedi depýtat.
Ol oblysta aýyzsýmen qamtý men jedel járdem kólikteriniń jetispeýshiligi men materıaldyq-bazalyq jaǵdaıynyń da syn kótermeıtinin tilge tıek etti. Sondaı-aq, Bozaı, Tassaı, Úshbıik aýyldarynda sý tasqyny kezinde buzylǵan kópirlerdi salýǵa 30 mlrd teńge qarajat qajet ekenine nazar aýdaryp, Úkimet basshysyna osy máselelerdi qaıta qarap, qarjy bólýdi surady.
