Baqanas aýylynda atalǵan joba aıasynda «BC Lengthy Life» JShS 4 páterli 6 turǵyn úıdi turǵyzǵan. Jalpy sany 24 keń ári jaıly páter óz ıelerine tabys etildi. Memlekettik baǵdarlama negizinde salynǵan bul baspanalar 638,4 mln teńgege satyp alynǵan.
Páter kiltin tabystaý saltanatyna aýdan basshylyǵy, qurylys kompanııasynyń ókilderi jáne jańa páter ıeleri qatysty. Jyldar boıy úıli bolýdy arman etken azamattar qýanyshtarymen bólisip, memleket tarapynan jasalǵan qoldaýǵa rızashylyqtaryn bildirdi.
Mundaı qýanyshty sátti О́tegen batyr aýylynyń turǵyndary da sezindi. «Turǵyn úı-kommýnaldyq ınfraqurylymdy damytýdyń 2023–2029 jyldarǵa arnalǵan tujyrymdamasy» aıasynda halyqtyń áleýmettik osal toptaryna 10 páter berildi. Bul – tek baspanamen qamtý baǵytyndaǵy alǵashqy qadamdardyń biri ǵana.
Aıta keteıik, búginde Ile aýdanynda 5443 azamat turǵyn úı kezeginde tur. Onyń ishinde 1878-i – kópbalaly otbasylar, 1993-i – halyqtyń áleýmettik osal toptaryna jatatyn azamattar, 807-si – jetim jáne ata-ana qamqorlyǵynsyz qalǵan balalar, 765-i – bıýdjettik sala qyzmetkerleri. Sondyqtan aýdanda baspanamen qamtý máselesi erekshe nazarda.
Almaty oblysy.
