Sáýir aıy bastalysymen Qyrǵyzstan, Túrikmenstan, Túrkııa, О́zbekstan, Ázirbaıjan elderinen ónerpazdar delegasııasy kele bastady. Aqtaýlyqtar olardy teńiz jaǵasyna arnaıy qurylǵan «Darhan dala» etno qalashyǵynda qarsy aldy.
«Darhan dala» etno-qalashyǵyndaǵy Mańǵystaý oblysynyń ár aýdan, qalalaryna bólip berilgen «Sýyn aıǵyr», «Sherqala», «Dástúr», «Batyrlar», «Jeti qaıqy», «Ǵashyqtar» jáne «Sheberler» aýyldary qoıylymdar qoıyp, ánnen shashý shashyp, kórmelerdi tanystyryp, sheberlik saǵattaryn ótkizdi. Salt-dástúr men mádenıetti dáriptegen is-shara birneshe kúnge jalǵasty.
Kıiz basý, urshyq ıirý, kelin túsirip, bet ashý, ulttyq bı, sondaı-aq qolóner buıymdarynan kórme uıymdastyryp, halqymyzdyń ulttyq baı tarıhy, óneri qonaqtar nazaryna usynyldy. Qonaqtar da qalys qalmaı, óz buıymdaryn, ulttyq erekshelikteri men jádigerlerin jaıyp kórsetti.
Birneshe kún qatarynan oblys aýdandarynan kelgen ónerpazdar án men jyrdy áýelete konsert qoıdy. Mysaly 5 sáýir kúni túpqaraǵandyq ónerpazdar bastaǵan merekelik konsert TÚRKSOI ártisteriniń gala konsertine jalǵassa, túste Munaıly aýdany án-jyrdan shashý shashty. Túsqaıta Jańaózen qalasy men Mańǵystaý aýdany ónerpazdary daıyndaǵan konserttik baǵdarlamasy usynyldy.
Aqtaýdaǵy aıtýly merekege TÚRKSOI-ǵa múshe memleketterden 200-ge jýyq qonaq keldi. Olardyń arasynda 50-ge jýyq laýazymdy tulǵalar men halyqaralyq uıymdardyń basshylary bolsa, qalǵany sheteldik ónerpazdar. Odan bólek, aýqymdy sharany tamashalaýǵa elimizdiń túkpir-túkpirinen de turǵyndar aǵylyp kelip jatyr.
Teńiz jaǵasyndaǵy bas sahnada keshki saǵat 19.00-de «Aqtaý – Túrki áleminiń mádenı astanasy» sharasynyń saltanatty ashylý rásimi ótedi.
Ashylý saltanatyna Dımash Qudaıbergen qatysyp, án áýeletpek.
Mańǵystaý oblysy
