Laparoskopııalyq ádis dástúrli operasııamen salystyrǵanda anaǵurlym zamanaýı jáne az ınvazıvti. Osyǵan deıin Ulytaý oblysynda mundaı hırýrgııalyq aralasý uzyndyǵy 30 santımetrlik tilik arqyly jasalatyn. Bul naýqastardyń qalypty ómirge oralýy men operasııadan keıingi aıyǵýyn qıyndata túsetin. Al, tiliksiz ádis pasıentterge operasııadan soń 1-2 saǵat ishinde aıaqqa turyp ketýine múmkindik beredi.
Operasııalar mindetti áleýmettik medısınalyq saqtandyrý esebinen, ıaǵnı aqysyz júrgizildi. Termınaldyq gıdronefroz (búırektiń jaramsyzdyǵy) dıagnozy boıynsha esepte turǵan eki naýqas ta MÁMS júıesinde saqtandyrylǵan.
Aıbat Baıjantaev 50 jasta, oǵan jumys berýshisi aı saıyn MÁMS tólemderin aýdarsa, sátbaevtyq Lıýbov Paharokova – zeınetker retinde jeńildik sanatynda.
Bul operasııa Ulytaý oblysynda alǵash ret júrgizilgenin atap ótý mańyzdy. Buryn mundaı aralasýdy júzege asyrý úshin pasıentter basqa qalalarǵa barýǵa májbúr bolatyn, bul aıtarlyqtaı qolaısyzdyqtar týdyratyny belgili. Alaıda, búgingi tájirıbe almasýǵa múmkindik bergen sheberlik synybynan keıin Jezqazǵan ýrologtary mundaı operasııalardy óz betinshe jasaı bermek.
Jalpy 2025 jyldyń basynan medısınalyq ortalyqtyń ýrologııa bóliminde MÁMS sheńberinde 100 naýqasqa ota jasaldy.
