Foto: parlam.kz
Depýtattyń pikirinshe kitaptar men baspany qoldaǵan jón. Eger QQS-ty tómendetpesek, kitaptar odan saıyn qymbattaıdy. Al balalar YouTube pen TikTok qana kóredi. Fransııa, Japonııa sııaqty elderde kitapqa múlde QQS salynbaıdy nemese úlken jeńildikter bar.
«Buryn soǵys kezinde adamdar ot ishinen kitapty alyp shyǵatyn. Al biz qazir solaı qurmettelgen kitapqa salyq salyp otyrmyz. Sondyqtan kitap pen balalarǵa arnalǵan baspa ónimderinen QQS-ty alyp tastaıyq», dedi májilismen.
A.Aımaǵambetovtiń aıtýynsha teatr, kitaphana, murajaı, qolóner – bıznes emes, bizdiń mádenıetimiz.
«Dıvandary men kreslolary bar teatr – keńestik dáýirden, al kitaptary sarǵaıǵan kitaphana – saýda ortalyqtaryndaı salyq tólemeýi kerek. Bul mekemelerdi korporatıvtik tabys salyǵynan bosatý qajet», dedi depýtat.
Májilismenniń sózinshe, emdeý jáne dári-dármek boıynsha durys qadam jasaldy.
«Rak, sırek kezdesetin aýrýlar, dıabet máseleleri turǵysynda Úkimet bizdiń usynysty qoldady. Bul mańyzdy qadamdy myńdaǵan otbasy sezinedi. Biraq odan basqa da mańyzdy aýrýlar jáne dáriler bar. Epılepsııa, psıhıkalyq buzylystar, ınsýlttan keıingi qalpyna kelý – bular da ómir sapasyn anyqtaıtyn jaǵdaılar, bundaı syrqat belgileri boıynsha da salyq salý – ádiletsizdik. Qazir 10% QQS ómirlik mańyzdy dárilerge de salynyp jatyr. Eger biz densaýlyq salasynda gýmanıstik salyq saıasatyn bastadyq desek – sońyna deıin barýymyz kerek», degen depýtat óz sózinde halyqtyń 40%-y emdelýge óz qaltasynan tóleıtinin t.b. jaıttardy aıtty.
«Al, transjırge – aksız kerek», degen Ashat Aımaǵambetovtiń aıtýynsha kóp adam tátti nárselerdi jaqsy kórgenimen, transjır – únsiz qaýip. Kóp elder oǵan múlde tyıym salǵan. Rak, semizdik, júrek-qan tamyr aýrýlary, dıabet – sonyń da saldary. Transjırge aksız – qaýipsizdik belbeýi sekildi, qıyn mezette ómirdi saqtap qalady.
Depýtattyń taǵy bir toqtalǵan máselesi – qazaqsha mýltfılmderdiń az ekeni, al salyqtyń moldyǵy.
«Búginde balalardyń kóbi basqa tildegi TikTok pen Netflix ǵana kóredi. Memlekettik tilde kontent az. О́ıtkeni, bizdiń anımasııalyq stýdııalar ár kadr úshin QQS tóleıdi. Qazaqsha mýltfılm shyǵarý qymbat. Ońtústik Koreıa, Polsha, Fransııa óz anımasııalaryn qorǵaıdy. Bizge de sol qajet», dedi depýtat.
Al, kazınolarǵa salyqty 20%, 30%, 50%-ǵa deıin batyl kóterý kerek ekenin aıtqan A.Aımaǵambetovtiń sózinshe árbir utylǵan stavka – bir otbasynyń úmiti, endeshe bul – bıznes emes, bul – úmitti jutatyn ındýstrııa.
«Bizdiń usynyp otyrǵanymyz – jeńildik emes, ádilettilik. Salyq júıesi muqtajǵa demeý bolýy tıis. Smartfon – kitaptan arzan bolmaýy kerek. Energetıkalyq sýsyn – sýdan arzan bolmaýy kerek. Osy usynystardy qoldaıyq», dep túıindedi Májilis depýtatty Ashat Aımaǵambetov.
