Belgili qarjyger Qalqazbek Ájibekov bul tarıhı jádigerdi alǵash ret sonaý 1988 jyly kóripti. Sol tusta Ulttyq banktiń sharýashylyq jónindegi basshylarynyń biriniń kabınetindegi úlken oıýly ústeldiń tarıhyn da suraǵan eken. Qazaq AKSR Memlekettik banktiń alǵashqy basshysy paıdalanǵan bul jıhaz astana Orynbordan Qyzylordaǵa kóshken 1925 jyly kelgen múlik bolyp shyǵypty.
Keıinnen oblystyq qarjy basqarmasy «Qarjy organdaryna – 80 jyl» dep atalatyn mýzeı ashqanda qundy muraǵa izdeý salady.
«Murajaıǵa jan-jaqtan eksponat jınaý bastalǵanda osy ústeldi suraýǵa Ulttyq bankke bardym. Biraq baıaǵy kabınetten burynǵy kórgen jıhazym tabylmady. Surastyryp júrip jaramsyz bolyp saraıda jatqan jerinen Qyzylordaǵa ákeldim», deıdi Qalqazbek Ájibekov.
Biraz jyldan keıin Qyzylordadaǵy qarjygerler mýzeıi de jabylyp, jádiger qaıtadan qoımaǵa jol tartqan eken. Bertinde jeke mektep ashqan qarjyger qundy murany ustaǵa jóndetip, mýzeı tórine qoıady.
Osylaısha, tarıhı jádiger jańa jaı taýypty.
Qyzylorda
