Alqaly jıynǵa Bas redaktorlar klýby músheleri, sondaı-aq sport pen mádenıet, bilim-ǵylym jáne aqparat salalarynyń qaıratkerleri qatysty. Is-shara aıasynda qazaqtyń ulttyq sport túrleri men mádenıeti týraly qundy aqparattar aıtylyp, belgili kúsh mádenıetin zertteýshi Abylaıhan Qalnazarovtyń qazaq kúresi men balýandar, asyq atý, kókparǵa qatysty birqatar kitabynyń qoljazba nusqasy, sondaı-aq «Qazaq kúshiniń kartasy» atty arnaıy jobasy tanystyryldy.
«Baluan tas» quryltaıshysy A.Qalnazarov jańa qurylymnyń maqsaty, baǵyt-baǵdarymen, aldaǵy josparlarymen bólisti.
«Osy sátten bastap «Qazaq kúshiniń kartasy» jobasy resmı túrde bastaý alady. Ony túrlishe ataýǵa bolady. «Qazaq kúshiniń kartasy», ıakı «Qazaq kúsh-qaıratynyń kartasy» nemese «Uly dalanyń kúsh kartasy» desek te, báriniń maǵynasy bir. Túrki áleminiń áleýetin kórsetedi. Basty maqsat – halqymyzdyń jaýyngerlik-sporttyq tarıhy men mádenıetiniń ajyramas bóligi alyp kúsh-qaırat ıeleriniń kúsh murasyn tizimdeý men zertteý. El aýzynda «Balýan tas» dep atalatyn aýyr tastardy izdep taýyp, olardyń geografııalyq ornalasý núktelerin kartaǵa túsirip, ulttyq qundylyq retinde mártebeleý men nasıhattaý», dedi ol.
Sondaı-aq senator Bıbigúl Jeksenbaı tarıhı-mádenı muranyń ishinde balýandyq synaqtar rásiminiń mańyzdy bolǵanyn aıta otyryp, aýyr tastardyń qazaq halqynyń erlik dástúrin, kúsh pen batyrlyqty dáripteıtin elementter retinde ǵasyrlar boıy saqtalyp kele jatqanyna toqtaldy.
«Qazaqtyń alyp kúsh ıeleriniń tarıhı rólin nasıhattaý maqsatynda aýyr tastardy zertteý – ulttyq mádenıetimizdi jańǵyrtyp, jastarǵa rýhanı muramyzdy túsindirip, nasıhattaýdyń mańyzdy tásilderiniń biri. Bul jaǵynan elimizde alǵash bastama kóterip otyrǵan Abylaıhan Mamyraıhanulyn qoldaýǵa qashanda ázirmiz. Men onyń batyr, balýan, tipten «túıe balýan» bolǵan analarymyz – Darıǵa, Aısáýle, Umsyn, Kúresh týraly áńgimelerin talaı estigen edim. Olar da nazardan tys qalmaıdy dep bilemin», dedi Bıbigúl Jeksenbaı.
«Qazaq kúshiniń kartasy» jobasy balýan tastardyń geografııalyq oryndaryn kartalyq tizimge engizip, tarıhı jáne mádenı-sporttyq mura retinde saqtaýǵa jol ashý, balýan tastarǵa qatysty ańyz-ápsana, hıkaıalar men el aýzyndaǵy áńgimeler, tarıhı derekterdi jınaqtaý jáne osyndaı kóshpeli salamatty ómir salty men sporttyq-jaýyngerlik erlik dástúrin ǵylymı aınalymǵa engizý syndy maqsattardy kózdeıdi.
Jıyn barysynda balýan Arman Súleımen, sportshy Qýanysh Sháripbekuly kúsh oıynyn kórsetip, Álıhan Dúısenbaı án shyrqady. Sondaı-aq yntymaqtastyqty jalǵastyrý maqsatynda «Baluan tas» pen Bas redaktorlar klýby arasynda ózara is-qımyl memorandýmyna qol qoıdy.
Jıyn «Bas redaktorlar klýby» qoǵamdyq birlestigimen birlesip, Ulttyq akademııalyq kitaphananyń, Ulttyq sportty qoldaý qorynyń qoldaýymen ótkizildi.
