Foto: QazAqparat
Ushaq apaty kezinde qaza tapqandarǵa arnalǵan memorıaldyq taqta «Hynalyg jáne Kóshpendiler joly» memlekettik tarıhı-mádenı jáne etnografııalyq qoryǵynyń aýmaǵynda ornatylǵan. Ázerbaıjannyń oxu.az aqparattyq portalynyń málimetinshe memorıaldyq taqtada ekıpaj músheleriniń esimderi jazylǵan. Igor Kshnıakın, Aleksandr Kalıanınov, Hokýma Alıevanyń esimderimen birge qaıtys bolǵandardy eske alý jazbasy da bederlengen. Eskertkishti ornatýǵa Ázerbaıjan alpınısteri úles qosqan.
Sonymen qatar, apattyń sońǵy kezine deıin jolaýshylarǵa nusqaý berip, sabyrǵa shaqyrǵan bortserik Hokýma Alıevanyń bıýsti qoıylady. Ákesi Djalıl Alıevtiń aıtýynsha Halyq batyry ataǵyna ıe bolǵan qyzynyń bıýsti Bakýdegi Qurmet alleıasynda ornatylady.
Media.az aqparattyń saıtynyń málimetinshe 33 jastaǵy Hokýma Alıeva Ázerbaıjannyń batysynda, Kalbajar oblysyndaǵy Sýsýzlýg aýylynda dúnıege kelgen. Gıandja qalasynda turǵan. 1996 jyly ol otbasymen Reseıge kóship, Volgograd oblysyndaǵy mektepte oqyǵan. Odan keıin otbasy Ázerbaıjanǵa qaıta oralǵan. Munda orta mektepti bitirip, Baký memlekettik ýnıversıtetinde bilim alǵan. Hokýma Alıevanyń ákesi aıtqan málimetke súıensek ol AZAL kompanııasynda bortserik bolyp 2016 jyldan bastap jumys istegen. Embraer E190AR ushaǵynyń Baký-Groznyı baǵytyndaǵy reısinde bortserik retindegi qyzmetin aıaqtap, kompanııa zańgeri qyzmetine aýysýǵa qamdanyp júrgen Hokýma Alıevanyń bul sońǵy reısi bolyp qala berdi.
Embraer E190AR Azerbaijan Airlines ushaǵynda Hokýma Alıevamen birge ushqysh Igor Kshnıakın, ushqysh Aleksandr Kalıanınov qaza tapty. Bes ekıpaj múshesiniń ekeýi bortserik Zýlfýgar Asadov pen Aıdan Rahımlı aman qaldy.
Eske salaıyq, bortta barlyǵy 67 adam bolǵan, onyń 38-i qaza tapty. Qaıtys bolǵandardyń ishinde alty adam Qazaqstan azamaty.
