Is-sharany Qazaqstannyń «Dostar» qaýymdastyǵy, Shvesııadaǵy Qazaq mádenı ortalyǵy jáne Qazaqstannyń Shvesııa Koroldigindegi elshiligi birlesip uıymdastyrdy.
«Naýryz – shekaralarmen shektelmeıtin, adamdardy jańarý, úmit pen birlik rýhynda biriktiretin mereke. Bul – keshirim men tatýlasý kúni, qýanyshpen bólisip, bir-birimizben baılanysymyzdy nyǵaıtatyn kún», dep atap ótti Qazaqstannyń Shvesııa Koroldigindegi Tótenshe jáne ókiletti elshisi Oljas Súleımenov.
Qonaqtar ulttyq taǵamdardan dám tatyp, naýryzkóje, ashyq otta daıyndalǵan palaý, shyǵys táttileri men shaıdan aýyz tıdi. Dombyra men qobyzdan kúı tógilip, «Qamajaı» men «Qara jorǵa» bıi merekeniń shyraıyn kirgizip, qonaqtardyń kóńilin serpiltti.
Merekege erekshe sán bergen sátterdiń biri Dımash Qudaıbergenniń jankúıerler klýbynyń óneri boldy. Olar qazaq tilinde shved halyq ánin jáne shved tilinde Abaıdyń «Jazǵyturym» óleńin oqyp, kórermenniń ystyq yqylasyna bólendi. Sonymen qatar toǵyzqumalaq oıyny, kóktem taqyrybyndaǵy sýret salý, karaoke men «tilek qabyrǵasyna» jazylǵan quttyqtaýlar merekeniń mazmunyn arttyrdy. Ulttyq kıimder men qazaq mádenıetiniń elementteri qoıylǵan fotoaımaq jarqyn sátterdi sýretke túsirýge taptyrmas oryn boldy.
«Dostar» qaýymdastyǵynyń tóraǵasy Spartak Zıkrın bul oqıǵanyń mańyzyn erekshe atap ótti.
«Biz úshin Naýryz – jaı ǵana kóktem merekesi emes, bul ulttyq dástúrlerimizdi saqtap, kelesi urpaqqa jetkizýge, mádenı dıalog almasýǵa múmkindik berýdiń joly. Qalyń kópshiliktiń qatysqany bizdi qýantady. Osynda jınalǵan bárimizdi Qazaqstan mádenıetine degen qurmet pen qyzyǵýshylyq biriktiredi», dedi ol.
