Aldaǵy besjyldyqta farmasevtıkalyq naryqtaǵy otandyq taýar óndirisiniń úlesin 50%-ǵa deıin ulǵaıtý maqsaty qoıylǵan. Osy maqsatqa qol jetkizý qadamdary, otandyq óndirýshige, jeke ınvestorǵa tartymdy jaǵdaılar jasaý múmkindigi «Atameken» kásipkerler palatasy uıymdastyrǵan jıynda talqylandy.
UQP tóralqasynyń farmasevtıkalyq, medısınalyq ónerkásip jáne medısınalyq qyzmetter komıtetiniń tóraǵasy Nurjan Otarbaevtyń aıtýynsha, byltyr elimizde ınvestısııa kóleminiń úshten birge qysqarýy densaýlyq saqtaý salasynyń kórsetkishterine teris áser etti. Sońǵy kezderi ósimniń negizgi kózi – memleket qarajaty bolyp otyr. Bul medısına sektorynda jeke ınvestor róliniń tómendeýin kórsetedi.
«Elimizde 2029 jylǵa deıingi ınvestısııalyq saıasattyń tujyrymdamasy bekitilip, onyń sheńberinde keminde 150 mlrd dollar tartý josparlanýda. Sheteldik ınvestısııaǵa qatysty problemalardyń ulttyq sıpatta ekenin túsinemiz, sondyqtan qysqa merzimde otandyq ınvestorlarǵa nazar aýdarý kerek», dedi spıker.
Investısııalyq ahýaldy jaqsartýǵa kedergi keltiretin faktorlar – bıýdjettik saıasattyń belgisizdigi, kelisimsharttardyń turaqsyzdyǵy, qajettilikterdi janama buǵattaý jáne salalyq normatıvtik quqyqtyq aktilerdegi ózgeristerdiń baıaýlyǵy. Sońǵy jyldary shekti baǵamen dárilik zattardy, medısınalyq buıymdardy satyp alý tizimderin bekitýdiń keshiktirilýine baılanysty qoımalarda qordyń artylýy jıilegen.
«Biryńǵaı dıstrıbıýtormen jasalǵan uzaq merzimdi kelisimsharttarǵa qaramastan, men otandyq óndirýshi retinde Densaýlyq saqtaý mınıstrliginiń tapsyrystaryn shekti baǵamen bekitýdiń keshiktirilýine nemese belgisiz sebeptermen Densaýlyq saqtaý mınıstrliginiń tapsyrystaryna zattardyń engizilmeýine baılanysty ózimniń medısınalyq ónimderimdi sata almaımyn», deıdi «ZHULDYZ KENAN» JShS dırektory Baǵlan Baqqulova.
Medısınalyq qural-jabdyqtardy óndirýshiler qaýymdastyǵynyń tóraǵasy Gúlmıra Muhamedjanova Densaýlyq saqtaý mınıstrligi usynyp otyrǵan medısınalyq tehnıkany satyp alý ádisterin tolyǵymen qaıta qaraý qajettigin jetkizdi. Onyń aıtýynsha, bul naryqtyń monopolııalanýyna jáne sapasyz medısınalyq qural-jabdyqtardy jetkizý qaýpine ákelýi múmkin.
Densaýlyq saqtaý vıse-mınıstri Erjan Nurlybaev baǵamen tapsyrystardy bekitý jáne naryqqa shyǵarylatyn ónimderdi reınjınırıngteý merzimderi baqylaýda ekenin aıtty. Qazir medısınalyq buıymdar nomenklatýrasynyń jobasy ázirlenip jatyr.
Máselelerdi sheshý úshin bıznes birqatar bastamalardy: otandyq ınvestor mártebesin engizýdi, memlekettik-jekemenshik áriptestikti qoldaýdy, satyp alýdy ońtaılandyrýdy jáne farmasevtıkalyq jáne medısınalyq ónimder naryǵyna shyǵý tetikterin jeńildetýdi usynyp otyr. Kóterilgen problemalardy egjeı-tegjeıli zerdeleý úshin naqty baǵyttar boıynsha qosymsha keńester ótkizilmek.
