Qurylys jumystary 2024 jyldyń jazynda bastalyp, tolyq abattandyrýmen sátti aıaqtaldy. Jańa tósenishter tóselip, oryndyqtar men qoqys jáshikteri ornatyldy, jaryqtandyrý júıesi tolyq jańartyldy. Jańa alańda balalar men sporttyq alańdar, ashyq aspan astyndaǵy jattyǵý qurylǵylary men demalys aımaqtary paıda boldy. Jaǵalaý endi sýburqaqtarmen, jaǵajaıǵa túsýge arnalǵan baspaldaqtarmen tolyqqan. Naýryz aıynyń sońynda gúlzarlar otyrǵyzý men qylqanjapyraqty jáne japyraqty aǵashtardy egý jumystary da aıaqtaldy.
«Bul tek abattandyrý emes – bul turǵyndar men qonaqtar úshin jaıly ári tartymdy qoǵamdyq keńistik qalyptastyrýǵa baǵyttalǵan mańyzdy qadam. Qonaev qalasy men Qapshagaı jaǵalaýy – sý týrızminiń iri ortalyqtarynyń biri. Jańarǵan jaǵalaý óńirdiń ınfraqurylymyn jetildirip qana qoımaı, onyń ınvestısııalyq áleýetin de arttyrady», dedi Almaty oblysynyń ákimi Marat Sultanǵazıev.
Uzyndyǵy 1 shaqyrym bolatyn jaǵalaý búginde demalys, serýendeý, sportpen shuǵyldaný men otbasylyq ýaqyt ótkizý úshin barlyq jaǵdaı jasalǵan keń ári zamanaýı keńistikke aınaldy. Jobanyń júzege asýyna «KSJ Freedom Life» kompanııasy 4,53 mıllıard teńge kóleminde qarjylyq qoldaý kórsetti. Bul – bıznestiń memleketpen tıimdi áriptestiginiń jarqyn kórinisi.
«Bul keńistikti shyn máninde zamanaýı ári tartymdy etý úshin biz aıtarlyqtaı resýrstar, ýaqyt pen kúsh jumsadyq. Bul – jaı ǵana ınfraqurylymdy jaqsartý emes, oblys ortalyǵy Qonaev qalasynyń bolashaq damýyna qosqan naqty úlesimiz. Biz qalanyń zor áleýetine senemiz. Mundaı jobalar onyń ómir súrýge jaılylyǵyn arttyra túsedi», dedi Freedom Holding Corp. bas atqarýshy dırektory Tımýr Týrlov.
Jaǵalaýdyń resmı ashylýynan keıin nysan kommýnaldyq menshikke berildi. Qonaqtar úshin arnaıy ekskýrsııa uıymdastyrylyp, otandyq ónerpazdar men bı ujymdarynyń qatysýymen merekelik konsert ótti.
«Biz iri holdıng retinde ESG qaǵıdattaryn ustana otyryp, qalalyq ortany jaıly ári shabyt syılaıtyn etip qalyptastyrýǵa baǵyttalǵan jobalarǵa basymdyq beremiz. Freedom Life kompanııasy sońǵy alty jyldan beri ómirdi saqtandyrý salasyndaǵy sıfrlyq qyzmet kórsetý boıynsha kóshbasshy bolýmen qatar, áleýmettik mańyzy bar bastamalarǵa da erekshe kóńil bólip keledi. Qonaevtaǵy jaǵalaýdy abattandyrý – bıznestiń qalalyq ınfraqurylymdy damytýǵa qosqan mańyzdy úles. Bul – bizdiń sanaly strategııamyzdyń ajyramas bóligi, halqymyzdyń jarqyn bolashaǵyna baǵyttalǵan naqty qadam», dedi KSJ Freedom Life basqarma tóraǵasy Azamat Erdesov.
Is-shara barysynda Almaty oblysynyń ákimi Qapshaǵaı sý qoımasynyń ekojúıesin saqtaý jáne Qonaev qalasyn óńirdiń basty týrıstik baǵyttarynyń birine aınaldyrý jónindegi josparlarymen bólisti:
«Alda áli de aýqymdy jumystar kútip tur. Týrısterge qolaıly jaǵdaı jasaý úshin zamanaýı ınfraqurylym damytylady. Sonymen qatar «Uly dala joryǵy» jáne órik festıvali sııaqty iri is-sharalar ótedi. Aldaǵy ýaqytta halyqaralyq deńgeıdegi jaǵajaı men bes juldyzdy eki qonaqúıdiń qurylysy da qolǵa alynbaq», dedi Marat Sultanǵazıev.
Almaty oblysy.
