Qasym Qaısenov atyndaǵy 68303 áskerı bóliminiń jeke quramyna jańa arnaıy tehnıkalardyń kiltin tapsyrý rásimine oblys ákimi Berik Ýálı, Tótenshe jaǵdaılar mınıstri Shyńǵys Árinov qatysty.
Oblys qurylǵaly beri óńirge 28 órt sóndirý tehnıkasy men 24 ınjenerli tehnıka berilgen. Saltanatty jıynda qutqarý qyzmetiniń qajettilikterine arnalǵan 23 tehnıkanyń kilti júrgizýshilerge tapsyryldy. Olardyń qatarynda joǵary ótimdi júk kólikteri, arnaıy qutqarý mashınalary men «Trekol» kóligi bar.
«Bizdiń aımaq – ormandy-dalaly, órt qaýpi joǵary óńir. Sondyqtan bul salada eńbek etip júrgen azamattarǵa artylar júk te, senim de mol. Olar – antyna adal, sertine berik, eldiń amandyǵyn bárinen joǵary qoıatyn azamattar. Sol turǵyda oqys jaǵdaılarǵa qashanda daıyn bolý maqsatynda qajetti qaýipsizdik tehnıkalardy kezeń-kezeńimen tolyqtyrý turaqty nazarda bolatynyn da basa aıtqym keledi», dedi óńir basshysy saltanatty rásimde sóılegen sózinde.
Tótenshe jaǵdaılar mınıstri Sh.Árinov jańa tehnıkalardyń qutqarýshylar jumysyna úlken serpin beretinine senim bildirdi. Is-shara sońynda oblys ákimi Tótenshe jaǵdaılar mınıstrimen birge Qutqarýshylar alleıasyna shyrsha kóshetterin otyrǵyzdy.
Abaı oblysy
