Ishki kóshi-qon qoldaýdan kende bolmaıdy

Bıyl qonys aýdarýǵa respýblıka kóleminde 7 344 kvota bólinip, mem­lekettik qoldaý kórsetetin 8 oblys – Abaı, Aqmola, Qaraǵandy, Qostanaı, Pavlodar, Soltústik Qazaqstan, Ulytaý, Shyǵys Qazaqstan oblystary belgilendi. Osy oraıda jýyrda elimizdiń jumys kúshi tapshy 7 oblysynan kelgen ókilder Túrkistan oblysynyń birqatar aýdanynda halyqpen kezdesip, jármeńkeler uıymdastyryldy.

О́ńir halqyna 10 myńnan asa, naqtyraq aıtsaq, Soltústik Qazaqstan oblysy – 2 959, Shyǵys Qazaqstan – 2 671, Pavlodar – 2 424, Qostanaı – 823, Qaraǵandy – 1 342, Ulytaý – 145, Abaı oblysy 104 bos jumys ornyn usyndy.

Eńbek jáne halyqty áleý­met­tik qorǵaý vıse-mınıstri Asqarbek Ertaev Túrkistan oblysyna jumys sapary barysynda qonys aýdarý jónindegi óńiraralyq jármeńkege baryp, jer­­gi­lik­ti atqarýshy organdardyń basshylarymen kezdesý ótkizdi.

«Qonys aýdarýshylarǵa aýyl sharýa­shylyǵy maqsa­tyndaǵy jer ýchas­ke­lerin 5 jyl merzimge ýaqytsha paı­dalanýǵa alýda jeńildikti jaǵdaı­lar jasaldy. Qonys aýdarýshylarǵa tóle­netin sýbsıdııalar bankter men basqa qarjy uıymdary aldyn­da­ǵy ne­sıelik mindettemeler boıynsha óndirip alýdan qorǵalǵan. Qan­dastardy nemese qonys aýdarý­shylardy qabyldaýdyń óńir­lik kvotasyna engizý, erikti qonys aýdarýshylarǵa memle­ket­tik qoldaý sharalaryn kór­setý jónindegi memlekettik qyz­met­ter­diń elektrondyq formatyna kóshý júzege asyryldy», dedi vıse-mınıstr.

Sondaı-aq A.Ertaev eńbek mobıldi­ligi ortalyqtaryna kóshý­ge nıet bildir­gen aza­mat­tarǵa keńes, ótinish berýge járdemdesý jónin­degi ju­­mys­ty jandandyrýdy usyndy.

«О́tken jyldyń ortasynan bastap barlyq qo­nys aýdarý­shy­larǵa FSM Social mobıldi qosym­sha­syn engizý arqyly jergi­lik­ti qoǵamdastyqqa beıim­de­lý jáne ıntegrasııalaý qyz­metteriniń keń spektri qoljetimdi boldy. Osy ke­zeńde 20,7 myń adam beıimdeý jáne ın­tegra­sııalyq qyzmet­termen qam­tyldy, – dedi vıse-mınıstr. – «Qonys aýda­rý kar­­tasy» qandastar men qo­nys aýdarý­shylarǵa onlaın rejimde qonys­­taný aıma­ǵymen, sonymen birge eńbek nary­­­ǵyn­daǵy aǵymdaǵy bos jumys oryn­­­darymen, tur­ǵyn úıdiń, qolda­nystaǵy ınfra­qurylymnyń bolýymen tanysýǵa múmkindik beredi».

Pavlodar oblysy eńbek mobıl­diligi ortalyǵynyń dırektory Merýert Esembae­vanyń aıtýynsha, bıyl ob­lys­qa qonys aýdarýǵa 3 354 kvota bó­linip otyr. О́tken jyly halqy tyǵyz or­na­las­qan óńirlerden 2 170 adam qonys aýdarǵan. Onyń ishinde, Túrkistan oblysy­nan 807 adam bar­ǵan. Shyǵys Qazaqstan oblysy, Marqakól aýdanynyń ákimi Rústembek Kemeshev 2025 jylǵa 269 qandas pen 372 qonys aýdarýshy kóship keledi dep josparlanǵanyn aıtty. Jalpy, 2024 jyly Shyǵys Qazaqstan oblysyna 781 adam qonys aýdarǵan. Soltústik Qazaqstan oblysy, Maǵjan Juma­baev aýdanyna qarasty «Pısarevka orta mektebi» KMM-niń dırektory Nurjamal Tambetova­nyń aıtýynsha, ótken jyly Túrkistan oblysynan 197 adam kóship kelgen. Búginde Soltústik óńirinde 1 643 – onyń ishinde, medısına, far­masev­tıka, bilim berý, aýyl sharýashylyǵy, energetıka, qurylys, kólik jáne logıstıka salasy, saýda salasynda bos jumys orny bar.

Jármeńkege kelýshilerge baǵdar­lama jónindegi qoldaý­lar jan-jaqty túsin­di­rildi. Mysaly, baǵdarlama aıasynda qa­tysý­shylarǵa, olar­dyń otba­sy múshe­lerine bir ret 70 AEK (275 240 teńge) mólsherinde kómek beriledi. Sonymen qatar 12 aı boıy jaldamaly baspana men kom­mýnaldyq tólem­­der­ge ar­nal­ǵan járdemaqy, jumys­pen qamtý, aýyl sharýa­­shyly­ǵyna jer bólý, jeke kásip ashý múmkindigi qaras­­­­tyryl­ǵan.

Jumys kúshiniń mobıldi­ligin arttyrý úshin erikti túrde qonys aýdarýǵa jár­dem­­desý maqsa­tynda ótken «Qonys aýdarý» jár­meńkele­rinde soltústik óńir­lerge kó­shýge nıet bildir­­gen­der de barshylyq. Mysaly, Túr­kistanda ótken jármeńke nátı­jesinde 128 turǵyn kóshý­ge nıet bildirdi. Saıram aýdanynan 50-den astam, Jetisaı aýda­nynan 38, Maqtaaraldan 35 azamat qonys aýda­­­­ratyn boldy. Maqtaaral aýda­ny­­nan 2018–2024 jyldar ara­ly­ǵynda 144 otbasy óz erki­men qonys aýdarǵan eken. Aıta keteıik, elimizdiń ju­mys kúshi jetispeıtin soltús­tik óńirlerine halyqty qonys­tandyrýǵa baǵyt­talǵan ju­mystar oblysta 2015 jyldan beri júrgizilip keledi.

Túrkistan oblysy