Sýretterdi túsirgen – Aqádil RYSMAHAN
Joba aıasynda tartylǵan ınvestısııa kólemi – 564 mlrd teńge. Alpaýyt kompanııa óndiristegi tájirıbesine súıenip, temir rýdasyn tereń óńdeýdiń tolyq sıklin jolǵa qoıýǵa táýekel etken. Birinshi kezeńde 1 mln tonnaǵa deıin armatýra, sozba sym, buryshty bolat óndirýdi qolǵa alsa, keıin 2 mln tonna profıldi jáne jolaqty bolat shyǵarýdy qolǵa almaq. Alǵashqy kezeńde 1 000-nan asa adam «eki qolǵa bir kúrek» tapsa, tolyq qýatqa kóshkende 2 500 azamat turaqty jumyspen qamtylady.
Kompanııa ókilderiniń aıtýynsha, temirdi bastapqy qalpyna keltirý tehnologııasy arqyly ónim quramyndaǵy temirdiń joǵary mólsherde saqtalýyna basymdyq berilmek.
«Memleket basshysy men Úkimettiń qoldaýy arqasynda óńirde ınvestorlar úshin qolaıly ahýal qalyptasty. Sheteldiń irgeli kompanııalarymen birlese jumys isteý arqyly iri jobalardy iske asyrýǵa basymdyq berip otyrmyz. О́ńirdiń ınvestısııalyq qorjynynda quny 3,6 trln teńgeni quraıtyn, 10 myńnan astam jańa jumys ornyn qurýǵa baǵyttalǵan 82 joba bar. Osy jyly jalpy somasy 175,2 mlrd teńgeni quraıtyn 30 jobany iske asyrýdy josparlap otyrmyz. Bıyl birinshi toqsanda ótken jyldyń sáıkes kezeńimen salystyrǵanda tartylǵan ınvestısııa kólemi 37,1%-ǵa artty. Qolǵa alynyp otyrǵan joba – memleket pen bıznes arasyndaǵy tabysty yntymaqtastyqtyń jarqyn úlgisi ári jańa múmkindikter men turaqty ósýdiń kórsetkishi», deıdi óńir basshysy Erbol Qarashókeev.
«Fujian Hengwang Investment Co Ltd» kompanııasynyń basqarma tóraǵasy Szen Chjaosıan Qazaqstan tarapynan kórsetilgen qoldaýǵa dán rıza ekenin jetkizdi. Onyń aıtýynsha, aýqymdy joba kórshiles elder arasyndaǵy baılanysty bekemdeı túsýge dáneker bolmaq.
Budan keıin óńir basshysynyń qatysýymen júgerini tereń óńdeý boıynsha aýqymdy ınvestısııalyq jobany júzege asyrýǵa baılanysty jańa zaýyttyń irgetasy qalandy. Jobaǵa qatysýshy «Shengtai Biotech Co Ltd» JShS ókilderiniń aıtýynsha, iske halyqaralyq naryqqa arnap bıoónimder óndirýmen aınalysatyn «Fufeng Group» kompanııasy kirisken. Jańa zaýyttyń óndiristegi qýaty jylyna 500 myńnan 1 mln tonnaǵa deıin júgeri óndirýge jetedi. Joba aıasynda tartylǵan ınvestısııa kólemi – 420 mlrd teńge.
Jobanyń qurylys kezeńinde 6 myń adam jumyspen qamtylady. Zaýyt paıdalanýǵa berilgen kezde 1 500 jumys orny qurylady. Dese de kásiporyn bastapqy kezeńde 400 adamdy jumyspen qamtıdy. Kompanııa basshylary 2026 jyly ónim óndirý úshin ázirge 300 myń tonna júgeri satyp alýǵa qulshynyp otyr. Sondyqtan jambyldyq sharýalarmen ofteık-kelisimshart jasasyp, ózara tıimdi áriptestik negizinde jumys isteýge nıetti.
«Prezıdent óńdelgen aýyl sharýashylyǵy ónimderiniń úlesin 70%-ǵa jetkizý týraly tapsyrma berdi. Sondyqtan dándi daqyldardy tereń óńdeý isine basymdyq beremiz. Bul zaýyt egistikten bastap, tutynýshyǵa deıin qosylǵan quny joǵary ónim óndiretin birtutas júıeni qalyptastyrady», deıdi oblys ákimi.
Jambyl oblysy,
Shý aýdany
