Hakatonda eldegi kitaphana isin jańǵyrtýda tájirıbesi mol almatylyq kitaphanashylar óz bilimin ózge óńirdegi áriptesterimen bólisti. Saladaǵy jańa qyzmet túrlerin talqylaýǵa jáne kitaphana salasyna sıfrlyq tehnologııa engizý máselesin qaraýǵa arnalǵan mańyzdy alańda túrli usynystar aıtyldy.
Búginde Almatyda táýlik boıy jumys isteıtin 24/7 kitaphanalar, avtonomdy kitaphanalar, RFID júıesi jáne sıfrlyq oqý zaldary bar. Bul bastamalardy qoldaǵan Memleket basshysy Qasym-Jomart Toqaev, ózge óńirlerdi de megapolıstiń ozyq tájirıbesin qabyldaýǵa shaqyrǵan bolatyn.
Hakaton qatysýshylary kitaphana salasyn damytýǵa baǵyttalǵan jobalar men ıdeıasyn tanystyrdy. Ońtústik Koreıa, Shveısarııa, Germanııa, Fınlıandııa, Estonııa jáne Shvesııa elderinde halyqaralyq taǵylymdamadan ótken Almatylyq jas mamandar sheteldik úzdik tájirıbe men olardy jergilikti jaǵdaıǵa beıimdeý tásili týraly aıtty.
«Búgingi kitaphanalyq hakaton joǵary deńgeıde ótti. Eldiń túkpir-túkpirinen kelgen mamandar keremet ıdeıa men tyń kózqaras usyndy. Biz áriptesterimizdiń jobasynan shabyt alyp, tájirıbemizdi qýana bólistik», – deıdi Batys Qazaqstan oblysy, Birlik aýylynyń kitaphanashysy, hakaton qatysýshysy Gúlbaqyt Dúısen.
Alǵashqy hakaton jas kitaphanashylardyń kásibı damýy jolyndaǵy mańyzdy qadam ǵana emes, sonymen qatar, Qazaqstan kitaphanalarynyń jańǵyrýǵa, ınnovasııa engizýge jáne eldiń mádenı-oqý ómirindegi ornyn nyǵaıtýǵa degen umtylysynyń jarqyn dáleli boldy.
Aıta keteıik, búginde Almatyda qala ákimdigine qarasty 30-ǵa jýyq zamanaýı kitaphana jumys isteıdi.
