Kollajdy jasaǵan – Qonysbaı ShEJIMBAI, «EQ»
«Kazlogistics» odaǵynyń bas dırektory Qanat Álmaǵambetovtiń aıtýynsha, logıstıkalyq segment damýǵa bet aldy. Keıbir kompanııalar servısin álemdik standarttarǵa sáıkestendirýge tyrysyp jatyr.
«Logıstıkada yqpaldastyrý úderisteriniń ózindik ereksheligi bar. Úlken aýmaqty alyp jatqan ári basqa eldermen tyǵyz baılanysy bar elimiz úshin kólik-logıstıkalyq júıeni damytý men ekonomıkany ártaraptandyrýǵa teris áser etetin kólik shyǵyndaryn azaıtý mańyzdy. Bul oraıdaǵy negizgi másele – tarıftik saıasat, elder arasynda kelisilgen jáne rettelgen tranzıt mólsherlemesin uıymdastyrý. О́ıtkeni logıstıkalyq bıznes bir eldiń aýmaǵyndaǵy logıstıkamen shektelmeıdi» deıdi Qanat Álmaǵambetov.
Forým barysynda sarapshylar 2025 jyly ındýstrııa óziniń sıfrlyq transformasııasyn jalǵastyratynyn, salanyń barlyq aspektisine qoıma operasııalarynan bastap júk tasymalyna deıin áser etetinin aıtty. Damýdyń negizgi baǵyttary odan ári avtomattandyrý men robottandyrýdy, mashınalyq oqytý algorıtmderin engizýdi, jetkizý tizbekteriniń ashyqtyǵyn kúsheıtýdi, sondaı-aq ekologııalyq turaqtylyq pen Azııa naryqtaryna baǵdarlanýdy qamtıdy.
Eýrazııalyq temirjol júk tasymaldary qatysýshylary odaǵynyń atqarýshy dırektory Sergeı Avseıkovtyń aıtýynsha, Reseıde de, elimizde de konteınerleý deńgeıine óte jaqsy dep baǵa berýge bolmaıdy.
«Qazirgi naryq qoıma operasııalaryn avtomattandyrý, robottandyrý sııaqty ozyq tehnologııalarmen ǵana erekshelenedi. Bul rette bıznes-úderisterdi jedeldetip, eńbek ónimdiligin arttyratyn jáne adam faktorynyń áserin azaıtatyn WMS-júıelerdi paıdalaný basym baǵytqa aınalyp otyr. Robottandyrý taýarlardy suryptaýdy, tasymaldaýdy, oraýdy avtomattandyrýǵa múmkindik beredi. Qazir bárimizge kelisim, úılesimdilik mańyzdy. Tasymaldaý úderisin basqarý júıesin jetildirse barlyq baǵytta kólik-logıstıkalyq servısterdiń deńgeıin arttyrýǵa bolady. Oǵan kedendik rejimderdi úılestirý, tasymaldaý qujattary júıesin birizdendirý, sondaı-aq EAEO aýmaǵy arqyly ótetin halyqaralyq kólik dálizderi arqyly júk tasymaldaýdy keńeıtý maqsatynda tarıftik saıasatty úılestirý kerek. Logıstıkany sıfrlandyrý jetkizý tizbeginiń barlyq kezeńinde ashyqtyq pen baqylaýdy qamtamasyz etedi. Blokcheın jáne IoT sııaqty tehnologııalardy paıdalaný naqty ýaqyt rejiminde júkterdiń ornalasqan jeri, taýarlardyń jaı-kúıi jáne basqa da negizgi parametrler týraly aqparat alýǵa jaǵdaı jasaıdy. Bul naryqqa qatysýshylar arasyndaǵy senimdi arttyrady jáne klıentterge qyzmet kórsetý sapasyn jaqsartady», deıdi Sergeı Avseıkov.
ALMATY
