Qaraly habardy M.O.Áýezov atyndaǵy ádebıet jáne óner ınstıtýty málim etti.
«Búgin belgili ádebıettanýshy, folklortanýshy ǵalym, Ulttyq Ǵylym akademııasynyń akademıgi, fılologııa ǵylymdarynyń doktory, QR Memlekettik syılyqtyń laýreaty Seıit Asqaruly Qasqabasov ómirden ótti», delingen qaraly habarlamada.
Seıit Asqaruly Qasqabasov 1940 jyly 24 maýsym kúni Semeı qalasynda dúnıege kelgen. 1947 jyly Semeı qalasynyń Jańasemeı bóligindegi №5 orta mektepke oqýǵa barady. 1967 jyly Qazaq SSR Ǵylym akademııasynyń M.O.Áýezov atyndaǵy Ádebıet jáne óner ısntıtýtynyń aspırantýrasyn bitirgen. 1969 jyly «Qazaqtyń qııal-ǵajaıyp ertegileri» degen taqyrypta kandıdattyq dıssertasııa qorǵaǵan.
Eńbek jolyn 1970-1981 jyldary Qazaq SSR Ǵylym akademııasynyń Qoǵamdyq ǵylymdar bólimshesinde ǵylymı hatshy ári «Qazaq SSR Ǵylym akademııasynyń Habarlary» atty jýrnalynyń jaýapty hatshysy bolyp bastady. Keıinnen Qazaqstan Respýblıkasy Ulttyq Ǵylym Akademııasy Ádebıet jóne óner ınstıtýtynyń ǵylymı qyzmetkeri, Qoǵamdyq ǵylymdar bólimshesiniń ǵylymı hatshysy, KSRO Ǵylym Akademııasy Álem ádebıeti ınstıtýtynyń aǵa ǵylymı qyzmetkeri, Qazaqstan Respýblıkasy Prezıdenti Apparatynyń qyzmetkeri, Qazaqstan Respýblıkasy Mınıstrler Kabıneti janyndaǵy Joǵary attestasııa komıssııasynyń tóraǵasy, L.N.Gýmılev atyndaǵy Eýrazııa ulttyq ýnıversıteti shyǵystaný fakýltetiniń dekany, Qazaqstan Respýblıkasy Ulttyq Ǵylym Akademııasy Ádebıet jáne óner ınstıtýtynyń dırektory qyzmetterin atqarǵan.
Ǵylymı-zertteý eńbekteri qazaq folklorynyń teorııasy men tarıhyna, ádebıet pen óner máselelerine, etnografııa men aýyz ádebıeti muralarynyń tekstologııasyna arnalǵan.
