Kezdesý barysynda saıası dıalogterdi nyǵaıtý, saýda-ekonomıkalyq baılanystardy keńeıtý, kóliktik ózara baılanysty damytý, syn-tegeýrinder men qaýip-qaterlermen birlese kúresý, sondaı-aq óńirdegi ornyqty damý men ekologııalyq qaýipsizdik máselelerine basty nazar aýdaryldy. Ortalyq Azııanyń Qytaımen ózara syılastyq pen teńdik qaǵıdattarynda kópjaqty ózara is-qımylynyń arhıtektýrasyn jaqsartý jónindegi usynystar talqylandy.
Qazaqstan Syrtqy ister mınıstri Murat Nurtileý sóz alǵanda óńirdegi turaqtylyqty qamtamasyz etý úshin sheshýshi salalardaǵy yntymaqtastyqty odan ári keńeıtý qajettigine nazar aýdara otyryp, «Ortalyq Azııa – Qytaı» kópjaqty formatyn nyǵaıtýdyń mańyzyn atap ótti.
«Formatymyzdyń «Ortalyq Azııa +» tetikteri arasynda flagmanǵa aınalýy, al kóshbasshylardyń aldaǵy kezdesýi máńgilik dostyq pen órkendeýdiń jańa kezeńine qadam basý úshin barlyq jaǵdaı jasalyp jatyr», dedi M.Nurtileý.
Otyrysqa qatysýshylar qazirgi jahandyq jaǵdaıda syndarly dıalogterdi jalǵastyrýdyń, bezbendelgen baılanystardy damytý men basym baǵyttar boıynsha kúsh-jigerdi úılestirýdiń mańyzdylyǵyna nazar aýdaryp, osy formattaǵy turaqty kezdesýlerge daıyn ekenin bildirdi.
Jabyq formattaǵy kezdesý sońynda Syrtqy ister mınıstrleri Aqparattyq kommıýnıkeni qabyldady, onda «Ortalyq Azııa – Qytaı» formaty sheńberinde tatý kórshilik, ornyqty damý jáne kópjaqty ózara is-qımyldy tereńdetý qaǵıdattaryna ortaq mindetteme bekitilgen.
ALMATY
