Ákimniń aıtýynsha, oblystaǵy 358 eldi mekenniń 192-si gazdandyrýǵa jatady. Qazirgi ýaqytta 84 eldi meken kógildir otynmen qamtylǵan, bul 404 myń adamdy nemese óńir halqynyń 58,2%-yn quraıdy. Jyl sońyna deıin taǵy 42 eldi mekenge gaz tartý kózdelip otyr.
Jetisý oblysy qurylǵanǵa deıin nebári 5 eldi meken ǵana gazben qamtylǵan bolatyn. Búgingi tańda gazdandyrý jumystary qarqyndy júrip jatyr. Atap aıtqanda, «Taldyqorǵan–Úsharal» magıstraldy gaz qubyrynyń qurylysy 97%-ǵa aıaqtalyp, 294 shaqyrymdyq qubyr jelisi salyndy. Sonymen qatar, 6 avtomattandyrylǵan gaz taratý stansııasyn ornatý jumystary bastalǵan. Joba qazan aıynda tolyq aıaqtalady dep josparlanǵan.
Atalǵan magıstral arqyly Aqsý, Sarqan jáne Alakól aýdandaryndaǵy 66 eldi mekendi gazdandyrý josparlanyp otyr. Qazirgi tańda jobalaý-smetalyq qujattama ázirlenip, onyń saraptamalyq qorytyndysy bıylǵy qyrkúıekte daıyn bolady. Bul jobalarǵa 2026–2027 jyldary respýblıkalyq bıýdjetten qarjy bólý qajet.
– Atalǵan jobalar tolyq iske asqan jaǵdaıda Jetisý oblysynyń 642 myń turǵyny nemese jalpy halyqtyń 92 paıyzy kógildir otynǵa qol jetkizedi, – dedi Beıbit Isabaev.
Ákimniń aıtýynsha, óńirdi gazben qamtý jumystary únemi baqylaýda jáne kezeń-kezeńimen júzege asyrylyp jatyr.
