Boks demekshi, О́zbekstan qurama komandasynyń sapynda qazaq oǵlandary da olja salyp júr. Qajyrly eńbegi men jigeriniń arqasynda álemdik arenada jeńis tuǵyrynan kórinip júrgen qandastarymyz az emes. Solardyń biri – Tashkent oblysy Qybyraı aýdany Qypshaq aýylynan shyqqan talantty boksshy, álem chempıony Rýslan Abdýllaev.
Jaqynda ol AQSh-tyń Kalıfornııa shtatynan oljaly oraldy. Oshýssensaıd qalasynda ótken kásipqoı boks keshinde fılıppındik Djıno Rodrıgony upaı basymdyǵymen (80–71, 80–71, 80–71) jeńdi. 8 raýndqa ulasqan jekpe-jekte Rýslan qarsylasyn nokdaýnǵa túsirdi. Rodrıgonyń Abdýllaevqa qaraǵanda tájirıbesi mol. Ol kásipqoı boksta 13 jekpe-jek ótkizdi. Al Rýslan óziniń ekinshi aıqasyna shyqty ári chempıondyq belbeý úshin tartysqa tústi.
Bul – Rýslannyń ǵana emes, kúlli eldiń mereıin ósirgen tarıhı jeńis. Muhıttyń arǵy jaǵynan jeńispen oralǵan boksshyny Qybyraı aýdany ákiminiń orynbasary R.Hasanov, jergilikti halyq saltanatty túrde qarsy aldy. Jankúıerleriniń ystyq yqylasyna bólengen boksshyǵa erekshe qurmet kórsetilip, aýdan ákimdigi atynan estelik syılyq tabys etildi.
Qypshaq aýyly – tarıhy tereń, dástúri baı meken. Aqsaqaldardyń aıtqanyna súıensek, soǵys jyldarynda qazaqtyń dańqty balýany Qajymuqan Muńaıtpasuly aýylǵa qonaq bolǵan kórinedi. Sol bir tarıhı sát aýyl turǵyndarynyń jadynda aıryqsha saqtalǵan, al búgingi Rýslan – ataqty balýannyń izin jalǵaǵan dańqty boksshy.
Rýslan áýesqoı boksta úlken belesterdi eńserdi. 2022 jyly Azııa qurlyǵynda dara shyqty. Sol kezde-aq tegeýrindi boksshy ósip kele jatqany baıqalyp, onyń esim-soıy kásibı mamandardyń nazaryna ilikti. Al 2023 jyly Tashkent tórinde ótken álem chempıonatynda Rýslan shırek fınalda fransýz boksshysy Lýnes Amraýıdi aıqyn basymdyqpen utty. Jartylaı fınaldyq jekpe-jekte Tokıo Olımpıadasynyń qola júldegeri armenııalyq Ovanes Bochkovty súrindirdi. Al fınaldyq aıqasta jazǵy Olımpııa oıyndarynyń qatysýshysy, Azııa chempıony mońǵolııalyq Baatarsýhıın Chınzorıgti súrindirip, 63,5 kg salmaq dárejesinde álem chempıony atandy.
Bolashaǵynan zor úmit kúttiretin Rýslan Abdýllaevtyń jeńisti joly jalǵasyn tabaryna senim mol. Onyń 2028 jyly Los-Andjeleste ótetin Olımpııa oıyndarynda da el namysyn abyroımen qorǵaıtynyna barsha jurt úmit artyp otyr. О́zbekstan ulttyq quramasynyń bas bapkeri Tolqyn Qylyshev Rýslannyń qaryshty qadamyna razylyq bildirip, «boks koroli» ósip keledi» dep baǵa berdi. Bul teńeý de tegin aıtylmasa kerek.
Aıgúl ERKIN,
jýrnalıst
TAShKENT
