Sýretti túsirgen – Erlan OMAR, «EQ»
Almatyda ótken «Jahandyq jáne ishki shoktar jaǵdaıynda aqsha-kredıt saıasaty men qarjy turaqtylyǵy» atty V ǵylymı-praktıkalyq konferensııada mamandar osy taqyrypqa nazar aýdardy. Ulttyq bank tóraǵasynyń orynbasary Vıtalıı Týtýshkınniń aıtýynsha, aqsha massasyn baqylaý – Ulttyq banktiń mindeti. Ulttyq bank aqsha basyp shyǵarmaý úshin turaqty aqsha massasyn qalyptastyrýǵa, aqsha ekonomıkada baqylaýsyz, beıbereket júrmeýi úshin artyq fıskaldyq yntalandyrý bolmaýyn qadaǵalaýǵa tıis.
«Ekonomıka júıesinde aqshaǵa saı taýar bolmasa ınflıasııa týyndaıdy. Mundaıda ekonomıkadaǵy ósimniń ǵumyry uzaq bolmaıdy. Osyndaı kúrdeli qubylysqa akademııalyq ortanyń qyzyǵýshylyq tanytýy mańyzdy. Bul jaǵdaıdy durys tanýǵa jáne durys sheshim qabyldaýǵa áser etedi. Búgin biz Ázerbaıjan men О́zbekstannan kelgen áriptesterimizdi monetarlyq saıasat salasyndaǵy ǵylymı izdenisterimen bólisý úshin qýana qarsy alamyz», dedi.
Konferensııadaǵy sessııalardyń biri baǵa kúızelisteri men qurylymdyq teńgerimsizdikter jaǵdaıyndaǵy makroekonomıkadaǵy úrdisterge arnaldy. Qatysýshylar el ekonomıkasynyń shıkizattyq táýeldiliginiń saqtalýy kezindegi ekonomıkalyq ósý faktorlary men táýekelderi, tómen ınvestısııalyq belsendilik jáne memlekettik qoldaý sharalary týraly talqylady.
2024 jylǵy jeltoqsannyń qorytyndysy boıynsha, aqsha bazasy 16,4%-ǵa, 14,6 trln teńgege deıin ulǵaıǵan. Aqsha massasynyń 10%-ǵa kóbeıýi ınflıasııa mólsherin 1 jylda 0,8%-ǵa deıin kóterip jiberedi. Al uzaqmerzimdi perspektıvada aqsha massasynyń 10%-ǵa kóbeıýi ınflıasııany 1,8%-ǵa deıin ósip ketýine áser etedi eken. Halyqaralyq tájirıbede basy artyq qarajattyń keri qaıtarylmaıtyny belgili. Qytaı nemese Túrkııada mundaı qarjy bızneske baǵyttalady. Bıznestiń basy artyq qarjyny sińirip alýyna múmkindik bar. Al bizdegi jaǵdaı basqasha. Naryq senimdi emes, bıznestiń təýekeli joǵary.
Ulttyq bank ókili Adam Júzbaev atap ótkendeı, qazir teńgedegi aqsha massasynyń deńgeıine áser etetin negizgi faktorlar nesıeleýdiń ósýi men bıýdjettik-fıskaldyq arna bolyp otyr.
ALMATY
