Foto: Mádenıet jáne aqparat mınıstrligi
Mádenıet jáne aqparat mınıstrliginiń málimetinshe, kórmege Shoqan Ýálıhanovtyń ómiri men shyǵarmashylyǵyna, ǵylymı eńbekterine qatysty qundy jádigerler qoıylǵan. Olardyń qatarynda ǵalymnyń qoljazbalary, ǵylymı eńbekteri, Reseı Geografııalyq qoǵamynyń músheligine qabyldanǵany týraly dıplomnyń kóshirmesi, sondaı-aq jeke zattary – bórki, myltyqtyń dúmi, Qashǵar ekspedısııasynan ákelingen qytaı vazasy, joryq torsyǵy, mys kese, zerli beldik syndy tarıhı buıymdar bar.
Kórmege usynylǵan jádigerler Ortalyq memlekettik mýzeı men «Altynemel» memorıaldyq mýzeı-qorynyń qorlarynan alynǵan.
Kórmeniń ereksheligi – Shoqan Ýálıhanovtyń týystaryna tıesili jeke buıymdardyń alǵash ret kópshilikke usynylýy. Solardyń ishinde qaryndasy Tájibaı kıgen sırek aqqý qaýyrsynyn tigilgen shapan, Bádúgúl apasynyń beshpenti, sondaı-aq belgili keńestik sýretshi N. Iа. Tretıakov salǵan Shoqan portreti erekshe qyzyǵýshylyq týdyrdy.
Is-shara aıasynda «Shoqannyń ǵylymı murasy» atty dóńgelek ústel ótip, oǵan tarıhshy, fılosof, etnograf, geograf jáne mýzeıtanýshy ǵalymdar qatysty. Olar ǵalymnyń ǵylymı murasynyń mańyzyn saralap, onyń qazaq rýhanııaty men ǵylymyna qosqan ólsheýsiz úlesi týraly baıandamalar jasady.
