Jetisý aýdany Aınabulaq shaǵyn aýdanyndaǵy №4 mamandandyrylǵan balalar-jasóspirimder sport mektebinde el tarıhyndaǵy eń uzyn – 1704 metr laǵman sozylyp, bul málimet elimizdiń Rekordtar kitabynda resmı túrde tirkeldi. Bul – jaı ǵana gastronomııalyq oqıǵa emes, shahar turǵyndarynyń aýyzbirliginiń nyshany ispetti, júrekke jylylyq uıalatqan sát edi. Almatynyń 50-den astam aspazy men aýdan turǵyndary laǵmannyń qamyryn eki saǵatta ılepti. Túrli etnos ókilderi ortaq dastarqan úshin birlik tanytyp, bir kisideı kúsh saldy.
Qazaqstan Rekordtar kitabynyń resmı ókili Baqytjan Sábıtuly: «Laǵman qansha metr bolsa da jańa rekord ornatyldy, óıtkeni mundaı is-shara elimizde alǵash ret ótkizilip otyr. Biz laǵmannyń uzyndyǵyn ǵana emes, etnosaralyq baılanystyń beriktigin de bekitemiz», dedi.
Dál osy kúni bir ústeldiń aınalasynan qazaq, uıǵyr, ózbek, dúngen, koreı men basqa ult ókilderi tabyldy. Bireý qamyr ılese, ekinshisi ıin keltirip, kóńildi júrdi.
«Árbir qatysýshynyń aldynda qamyrdyń úzilmeýin qadaǵalaý mindeti turdy. Keıbir qıyndyqqa qaramastan, aspazdarymyz údeden shyqty», deıdi Almaty qalasy Jetisý aýdandyq Analar keńesiniń tóraıymy Rahıma Omarova.
Aspazdyq oqıǵaǵa bolysqan Zýhra Izmasova: «Sál aýyr, tym uzyn laǵman, biraq tapsyrma neǵurlym qıyn bolsa, soǵurlym qyzyqty bolady eken» deıdi.
ALMATY
