Foto: baribar.kz
Áýlıeniń orys tamyry
Áýlıeniń Iаkov (Iаshka) Býtakov degen ulty orys dosy bolǵan eken. Ol ózi Baıanaýylda turǵan. Máshekeń sol orys tamyrynyń monshasyna túsip shyqqan soń samaýrynnyń shaıyn ishkendi unatqan eken. Sondaı kúnderdiń birinde Iаshka men onyń úsh qyzy «Alladan ul surap berińiz» dep áýlıeden bata tilepti. Máshhúr Júsip bata qaıyryp, atqosshysy Imanǵalıǵa sómkesinen qaǵaz-qalam aldyrtady. Tumar jazyp berip, Iаshkanyń jary Raısaǵa moınyna taǵyp alýdy tapsyrypty. Áýlıeniń sharapatymen keler jyly ul bala dúnıege kelgen kórinedi.
Maıdanǵa tumarmen attanǵan
Sol balanyń erjetýi – ekinshi dúnıejúzilik soǵystyń bastalǵan kezeńine tuspa-tus kelip, maıdanǵa shaqyrtylady. Úıinen soǵysqa attanar mezetinde anasy tumaryn sheship, balasynyń moınyna taǵyp, «shamań kelgenshe moınynnan sheshpe» dep tapsyrǵan eken.
Jas jigit soǵysta baıanaýyldyq jigittermen ushyrasyp qalyp, jón bilisken kezde, qazaq jigitteri «Kimniń balasysyń?» dep suraǵanda, «Máshhúr atanyń» degen ǵoı. «О́tirik aıtyp tur» dep ılanbaǵan soń, tumaryn ashqan. Tumarda:
«... Eı Alla, sen meni shyn Máshhúr deseń,
Myna orystan bir ulyńdy aıama!», –
dep jazylǵan eken. Baıanaýyldyq orys jaýyngeriniń sózi shyn ekenine qazaq jigitteri solaısha kózi jetipti.
Sońǵy hat
Sol orys jigiti bir urysta qatty jaralanyp, gospıtalge túsken kezde tumaryn joǵaltyp alypty. (Sirá, medbıkeler qan tıgen kıimderimen qosa, tumardy da sheship alyp, laqtyryp tastaǵan bolýy kerek). Tumaryn surastyryp izdese, eshkim bilmeıtin bolyp shyqqan. Úıine jibergen hatynda: emdelip bolyp, qaıtadan urysqa kireıin dep jatqanyn, qazir «tumary joq» ekenin, endi aman bolýy ekitalaı ekenin jazypty. Sońǵy haty eken, sodan keıin ol jigitten habar-oshar múlde bolmapty.
(Foto: qarmaqshy-tany)
El arasynda sol jigitti Máshhúr Júsip bergen moınyndaǵy tumary talaı ret ajaldan saqtap qalǵan degen ańyz bar.
