Sýretti túsirgen – avtor
Podgornoe aýylynyń qaq tórinde asqaqtaı boı túzegen memorıal batyrlardyń erligin áıgileıtindeı. Soǵystan keıingi jyldary ornatylǵan qarapaıym ǵana obelısk aýyl jurty úshin qasıetti orynǵa aınalǵan. Ýaqyt óte kele aýyl azamattary úsh batyrdyń esimin laıyqty túrde ulyqtaıtyn eńseli eskertkish turǵyzý kerek dep sheshken. Bul istiń basy-qasynda júrip, nar táýekel etken azamattar az bolmady. Qoblan Qamzın, Vasılıı Panıýkov, Qınaıat Besekenev, Mels Talyspaev, Gennadıı Pısmarkın, Aleksandr Fedosov sekildi el azamattary qolynan kelgen kómekti aıamaǵan. Qurylys jumysyn sheber Qızatolla Jetenov tııanaqty atqaryp, el rızashylyǵyna bólengen. Bul 2010 jyldyń 9 mamyry edi. Jeńistiń 65 jyldyǵy qarsańynda tarıhı eskertkishtiń saltanatty ashylýy ótti.
2012 jyly memorıal qaıta jańǵyrtylyp, mármár taqtadaǵy sózderdiń qasyna tyrnalardyń beınesi qondyryldy. Qazaq dalasynda qalyqtaǵan tyrnalar – árqashan saǵynyshtyń, máńgilik rýhtyń nyshany. Eskertkish aldynda úsh batyrdyń qola músini ornatyldy. Tómende janyp turǵan Máńgilik alaý – búgingi urpaqtyń júregindegi ottyń belgisindeı. Qara mármár taqtaǵa qashalǵan ondaǵan esim – osy aýyldan maıdanǵa attanǵan erlerdiń óshpes izi.
Batyrlarǵa toqtala ketsek, Ivan Iаroskıı Tynyq muhıt flotynyń 390-teńiz atqyshtar batalonynda rota komandıri bolyp, keńes-japon soǵysynda erligimen kózge túsken. О́lim men ómir beldesken syn saǵatta onyń batyldyǵy búkil bólimsheniń taǵdyryn sheshken. Soǵystan keıingi jyldary Reseıdiń Lenıngrad oblysynda ǵumyr keshken.
Al Nıkolaı Fonov – 59-artıllerııalyq polktiń serjanty, zeńbirek komandıri. Ol jaýdyń birneshe tankisin órtke orap, aty ańyzǵa aınalǵan eken. Týǵan jerine din aman oralǵanymen, densaýlyǵy syr berip, erte kóz jumǵan.
Sergeı Sednev – Dneprdiń asaý aǵysynda pontondyq parkti basqaryp, jaýyngerlerdiń ózennen aman-esen ótýine jaǵdaı jasaǵan jankeshti jaýynger.
Búginde Podgornoe aýylyndaǵy olardyń eskertkishteri – ótkenniń emes, máńgiliktiń nyshany. Jyl saıyn 9 mamyrda aýyl turǵyndary eskertkish basyna jınalyp, gúl shoqtaryn qoıyp, batyrlardy únsiz eske alady. Aıtqandaı, 2015 jyly Jeńistiń 70 jyldyǵy qarsańynda mektepte arnaıy mýzeı ashylyp, batyrlardyń ómir joly men maıdandaǵy erlikteri týraly tyń derekter jınaqtaldy.
Podgornoenyń bul eńseli eskertkishi – eldiń eldigin, birligin kórsetetin bıik rýhtyń rámizi. Batyrlar erligi – urpaqqa amanat, ony dáripteý – paryz. О́ıtkeni el úshin jan qıǵandardyń esimi – máńgilik!
Shyǵys Qazaqstan oblysy,
Samar aýdany
