Aýqymdy jıynnyń maqsaty – klımattyq kún tártibin naqty iske asyrýǵa yqpal etý, qarjylyq tetikterdi tıimdi paıdalaný jáne ekologııalyq turaqtylyqty qamtamasyz etý baǵytyndaǵy aımaqtyq yntymaqtastyqty tereńdetý. Konferensııa barysynda klımattyq qaýipsizdik, sý tapshylyǵy, jańartylatyn energııa kózderin damytý, klımattyq ózgeristerge beıimdelý sharalaryn kúsheıtý máseleleri jan-jaqty qozǵalyp jatyr.
Sondaı-aq Parıj kelisimi aıasynda ulttyq úlesterdi jańartý, transshekaralyq seriktestikti arttyrý, ekologııalyq saıasatqa ınnovasııalyq tehnologııalardy engizý jáne klımattyq qarjylandyrý kólemin aldaǵy bes jylda 25 paıyzǵa kóbeıtý sekildi naqty baǵyttar kún tártibine qoıyldy. Buǵan qosa konferensııa jumysy aldaǵy COP-30 konferensııasyna daıyndyq aıasynda atqarylatyn sharalardy pysyqtaýǵa arnaldy.
Aıta keteıik, Ortalyq Azııa óńiri – klımattyq ózgerister saldarynan eń kóp zardap shegip otyrǵan aımaqtardyń biri. Muzdyqtardyń qarqyndy erýi, sý resýrstarynyń tapshylyǵy, apattyq sıpattaǵy tabıǵı qubylystar – osynyń bári óńirdegi elderdiń ekonomıkalyq jáne áleýmettik damýyna tikeleı áserin tıgizip jatyr.
Halyqaralyq is-shara aıasynda uıymdastyrylǵan «Ortalyq Azııa elderiniń klımattyq saıasaty: jetistikter men aldaǵy josparlar» atty sessııada Qazaqstannyń Ekologııa jáne tabıǵı resýrstar vıse-mınıstri Mansur Oshýrbaev elimizdiń jańartylatyn energııa salasyndaǵy tabystary men strategııalyq baǵyty týraly keńinen aıtyp berdi.
Vıse-mınıstrdiń aıtýynsha, 2014 jyldan beri elimizde jańartylatyn energııa kózderiniń ornatylǵan qýaty 18 esege ósken. Bul – júıeli túrde júrgizilgen memlekettik saıasattyń, halyqaralyq yntymaqtastyqtyń jáne ınvestısııalyq qoldaýdyń nátıjesi. Qazaqstan búginde 2060 jylǵa deıin kómirtegi beıtaraptyǵyna qol jetkizý maqsatyn aıqyn belgilep, osy baǵyttaǵy jumystardy kezeń-kezeńimen júzege asyryp keledi. Sondaı-aq elimiz Ázerbaıjan jáne О́zbekstanmen birlesip, turaqty energetıka salasynda ortaq jobalardy iske asyrýdy kózdep otyr. Bul bastamalar óńirlik tehnologııalyq almasýdy jáne birlesken ǵylymı-zertteý áleýetin nyǵaıtýǵa baǵyttalǵan.
«Jasyl damý – qorshaǵan ortany qorǵaý ǵana emes, sonymen qatar eldiń ekonomıkalyq qýatyn arttyrýdyń jańa múmkindigi», dedi M.Oshýrbaev óz sózinde.
Konferensııa qorytyndysynda aımaq elderiniń klımattyq saıasattaǵy yqpaldastyǵyn arttyrýǵa baǵyttalǵan birlesken málimdeme – qorytyndy deklarasııa qabyldanady dep kútiledi. Bul qujat óńirlik turaqtylyqty qamtamasyz etýge jáne Ortalyq Azııanyń klımattyq syn-qaterlerge qarsy turý qabiletin nyǵaıtýǵa negiz bolmaq.
