Foto: Sıfrlyq damý, ınnovasııalar jáne aeroǵarysh ónerkásibi mınıstrligi
Sıfrlyq damý, ınnovasııalar jáne aeroǵarysh ónerkásibi mınıstrliginiń habarlaýynsha, irikteý nátıjesinde 58 qatysýshy baǵdarlamaǵa ótken. Olardyń ortasha jasy – 33. Qatysýshylar qatarynda tehnologııa men bıznes salasynda mol tájirıbesi bar mamandar bar. Arasynda tájirıbeli kásipkerler, korporatıvtik sektor qyzmetkerleri, frılanserler, sondaı-aq halyqaralyq kompanııalar men iri tehnologııalyq jobalarda jumys istegen mamandar da kezdesedi.
Baǵdarlama aıasynda qatysýshylar óz startap ıdeıalaryn naqty AI-ónimderge aınaldyrýǵa múmkindik alady. Bul rette, AI’preneurs qatysýshylary derekter jıyntyqtary, esepteý resýrstary, sondaı-aq SAFE kelisimi sheńberindegi bastapqy ınvestısııalar sııaqty mańyzdy resýrstarmen qamtamasyz etiledi.
Qazaqstan Respýblıkasynyń Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev bul bastamanyń ulttyq deńgeıdegi mańyzyn atap ótti.
«AI’preneurs – jaı ǵana akselerator emes, bul – erteńgi kúnniń máni men tehnologııasyn jasaıtyn adamdarǵa jasalǵan ınvestısııa. Búginde jasandy ıntellekt aınalasyndaǵy ekojúıe tez damyp keledi. Biz, memleket retinde, myqty komandalar men talanttarǵa damý úshin naqty alań usynýymyz kerek. Osy rette, qatysýshylar óz ıdeıalaryn naqty AI-ónimderge aınaldyrý úshin jan-jaqty qoldaýǵa ıe bolady. Biz olardy derekter jıyntyqtary men esepteý qýattylyǵynan bastap, SAFE kelisimi aıasyndaǵy bastapqy ınvestısııalarǵa deıin mańyzdy resýrstarmen qamtamasyz etemiz. Bul bastamalar – Memleket basshysy qoıǵan strategııalyq maqsattarǵa qol jetkizý jolyndaǵy mańyzdy qadam. Atap aıtqanda, 2030 jylǵa qaraı 10 myń AI-maman daıarlaý, 5 tehnologııalyq «ıýnıkorn» shyǵarý jáne jyl saıynǵy IT-qyzmetter eksportyn $5 mıllıard jetkizý kózdeldi», dedi mınıstr Jaslan Mádıev.
AI’preneurs baǵdarlamasy offlaın formatta Astanada ótedi. Basqa qalalar men elderden kelgen qatysýshylar úshin baǵdarlama kezeńinde tegin turǵyn úı qarastyrylǵan. Úsh aılyq oqytý kezeńi barysynda qatysýshylarǵa bilim berý is-sharalary, salalyq sarapshylarmen jeke keńester, ıntensıvti praktıkalyq jumys usynylady.
Bul baǵdarlama jasandy ıntellekt salasyn damytýǵa baǵyttalǵan ulttyq bastama aıasynda júzege asyrylyp otyr. Onyń maqsaty – AI tehnologııalaryn qoldanatyn kásipkerlerdiń myqty ekojúıesin qalyptastyrý.
Aıta ketý kerek, AI’preneurs baǵdarlamasynyń birinshi legi de joǵary qyzyǵýshylyq týdyrǵan bolatyn. Byltyr 250 ótinimniń ishinen 50 maman iriktelip, 21 komanda qurylǵan. Sonyń ishinde 9 komanda akselerasııany sátti aıaqtap, Seed Money aıasynda qarjylandyrý alǵan.
