Memlekettik til – meniń mereıim!

Tatýlyq – qymbat qazyna

Túrli ulttar men ulystardy bir shańyraq astyna biriktirgen Assambleıanyń aıtýly merekesi óńirlerde túrli is-sharalarmen atalyp ótýde. Solardyń biri Pavlodar qalasynda oblystyq tilderdi damytý jónindegi basqarmasynyń uıytqy bolýymen ótken etnos jas­tary arasyndaǵy «Til – tatýlyq tiregi» baıqaýy boldy. Baıqaýǵa 18 ben 30 jas aralyǵyndaǵy ózge ult ókilderi qatysty. Olar óńirdiń qala men aýdandarynda osy baıqaýdyń irikteý kezeńinen ótken jeńimpazdar. Qatysýshylar memlekettik til týraly beınerolıkter daıyndap, berilgen taqyrypqa esse jazdy. Baıqaý qorytyndysy boıynsha I oryndy Aqsý qalasynyń ókili Elena Garkava, II oryndy Pavlodar qalasynyń úmitkeri Maııa Ivanova jáne III oryndy Ekibastuz qalasy namysyn qorǵaǵan Aıda Magerramova ıelendi. Júldegerler arnaıy dıplom, alǵys hat jáne baǵaly syılyqtarmen marapattaldy. Baıqaý jeńimpazy Elena Garkava – ýkraın qyzy. S.Toraıǵyrov atyndaǵy Pavlodar memlekettik ýnıversıtetiniń 4-kýrs stýdenti. Bolashaq mamandyǵy – jýrnalıst. Ýnıversıtettiń qoǵamdyq ómirine belsendi qatysqany, úzdik oqýy men jeke jetistikteri úshin PMÝ grantyna ıe bolǵan. Ol «VIII Máshhúr Júsip oqýlary», «V S.Toraıǵyrov oqýlary», «HIII Sátbaev oqýlary» halyqaralyq jáne respýblıkalyq ǵylymı-prak­tıkalyq konferensııalarǵa turaqty qatysyp keledi. Qazaq aqyn-jazý­shylary shyǵarmalaryn mánerlep oqý boıynsha qalalyq, oblystyq jáne respýblıkalyq baıqaýlarda baǵyn synap, birneshe márte júldeli oryndar ıelengen. Til saıasatyn júzege asyrý aıasynda ótetin «Til – adam janyn tanýdyń kilti», «Abaı oqýlary», M.Maqataev jáne M.J. Kópeıuly shyǵarmashylyq muralaryn nasıhattaýǵa arnalǵan konkýrstarǵa da belsendi qatysady. Astanada ótken «Til – tatýlyq tiregi» atty memlekettik tildi meńgergen ózge ult ókilderiniń jastary arasyndaǵy IV respýblıkalyq forýmyna qatysty. Armany asqaq E.Garkavany qur­­by-qurdastary erekshe maqtan tutady. Bolashaq jýrnalıst oqý praktıkasyn oblystyq «Saryarqa samaly» gazetinde ótken. Qazaq tilinde maqala, tezıs, sholý men sa­rap­tamalyq materıaldar jazýdy úı­rendim, shyǵarmashylyq qabiletimdi shyńdadym, deıdi ol. Elena mektepte orys tilinde oqyǵan. Qazaq tilin oqyp-úırenemin degen qulshynysy men zor talabynyń arqasynda memlekettik tildi erkin meńgergen. Elenanyń osyndaı erik-jigeri men eńbegi ózgelerge úlgi bolady degen oıdamyz. Memlekettik tildi erkin meńgergen E.Garkavanyń mereıi árdaıym ústem bolaryna kámil senemiz. Aqylbek SATYBALDIN. PAVLODAR.