«Atameken» basshysy fabrıkada «KMG PetroChem» JShS basqarma tóraǵasynyń bıznesti damytý jónindegi orynbasary Dıaz Dııanovpen, «Kazakhstan Petrochemical Industries Inc» kompanııasynyń basshylyǵymen kezdesti. Jıynda «Bal Tekstıl» úlgisinde otandyq qamtýdy arttyrý máseleleri talqylandy.
Máselen, «Bal Tekstıl» tutynatyn polıpropılen shıkizatyn fabrıkanyń ózi shyǵarady. Osy sekildi kásiporyndar taýar shyǵarýda otandyq shıkizatqa kóbirek ıek artqany jón degen pikir bildirdi palata tóraǵasy. Bul birinshiden, otandyq óndiristi sheteldik shıkizatqa táýeldilikten aryltsa, ekinshiden kásipkerlik salasynyń damýyna serpin beredi. Iri kásiporyn janynan qosymsha óndirister ashylý arqyly jańa jumys oryndary paıda bolady. Bul óz kezeginde eldiń áleýmettik máselesin sheshýge septigin tıgizedi. «Otandyq ónim neǵurlym ózimizdiń shıkizatpen, jergilikti tehnologııamen jasalǵan saıyn soǵurlym ulttyq ekonomıka qaryshtap damıdy», dedi R.Batalov.
«Bal Tekstıl» – otandyq iri taýar óndirýshi. Osy sekildi óńirlerdegi kompanııalarǵa «Báıterek», «Damý» qorlary arqyly qoldaý kórsetip, jeńildetilgen nesıe berýdi qarastyrý kerek. Sonymen qatar otandyq kompanııalar arasynda offteık kelisimsharttar túzýdiń de mańyzy zor. Bul kelisimsharttyń maqsaty – shyǵarylatyn taýardy satyp alatyn tutynýshylarmen aldyn ala kelisimder jasasý», dedi R.Batalov.
Aıta keteıik, «Bal Tekstıl» – kilem men kilem ónimderin shyǵaratyn fabrıka. Kompanııa Ortalyq Azııa naryǵynda da úlken bedelge ıe. Keıingi jyldary Eýropa elderi tarapynan da suranys kúsheıdi.
ShYMKENT
