Sonymen dál osy kúnderi Almatynyń ındýstrıaldy aımaǵynda úsh birdeı jańa zaýyt paıdalanýǵa berilgendikten, aıtýly oqıǵaǵa oraı osy aptada BAQ ókilderi jumysy qyza bastaǵan jańa óndiris oryndaryna baryp, radıator, kabel, kosmetıkalyq ónimder shyǵaratyn kompanııalardyń qyzmetimen tanysty.
«Valtherm» JShS alıýmınıı jáne bımetall jylytý radıatorlaryn shyǵaratyn zaýytqa salynǵan ınvestısııa kólemi 10 mlrd teńgeden asady. Búgingi tańda zaýytta bes quıý mashınasy ornatylǵan, kún saıyn 10 myńǵa deıin radıator bólikteri shyǵarylady. Aldaǵy ýaqytta kompanııa quıý mashınalarynyń sanyn 12-ge deıin jetkizip, óndiris kólemin jylyna 15 mıllıon seksııaǵa deıin ulǵaıtýdy kózdep otyr. Kásiporynda avtomobılge uqsas anaforezdi boıaý tehnologııasy qoldanylady, ol berik ári tot basýdan qorǵaıdy. Jáne bul tehnologııa radıatorlardyń syrtqy túri men qasıetterin 20 jyl boıy saqtaýǵa múmkindik beredi.
Sol sııaqty 2024 jylǵy jeltoqsanda ındýstrııalyq aımaqta Kabeldik-ótkizgish ónimderin shyǵarýǵa mamandanǵan «Harmony Cable» JShS kásiporny jumysyn bastady. Jobaǵa salynǵan ınvestısııa kólemi shamamen 2 mlrd teńge. О́ndiristi iske qosý nátıjesinde 50 jumys orny quryldy. Qýattylyq aıyna 100 tonnaǵa deıin mys óńdeýge jáne jylyna 8 mlrd teńgeden astam somaǵa 21 600 mln metrge deıin kabel men sym shyǵarýǵa múmkindik beredi.
Búgingi tańda kásiporyn qazaqstandyq qurylys kompanııalarymen jáne elektr taýarlaryn jetkizetin bólshek saýda oryndarymen belsendi jumys isteıdi. О́nimniń negizgi kólemi el ishinde satylady, alaıda kompanııa Qyrǵyzstan men Tájikstanǵa eksportqa shyǵyp, Eýropa elderine jetkizilimderdi keńeıtýdi josparlap otyr.
«Biz Balqashtan satyp alynatyn qazaqstandyq mystan kabel shyǵaramyz. Qaıta óńdeý kólemi jylyna 1200 tonnaǵa jetedi. Qazir biz katankadan sym óndirý jelisin iske qosyp, kabelderge arnalǵan plastıkat – oqshaýlaǵysh materıal óndirý qýatyn keńeıtip jatyrmyz», dedi «Harmony Cable» JShS kommersııalyq dırektory Mádı Muhanuly.
Búginde Qazaqstan mysy kóbinese Túrkııaǵa, sol jerden Eýropaǵa eksporttalady. Kompanııanyń maqsaty-aralyq tizbekterdi aınalyp ótip, eýropalyq naryqqa shyǵý.
Kosmetıkalyq ónimder men turmystyq hımııa óndirisine mamandanǵan «Telli Ondiris» JShS zaýyty 2024 jyldyń qańtar aıynan bastap jumys isteıdi. Jobanyń quny 3 mlrd teńgeni qurady, onyń 465 mln teńgesi — «Almaty qarjy» JShS kredıttik qarjylandyrý. Kásiporyn aýmaǵynda óndiristik jáne qoıma úı-jaılary, sondaı-aq akkredıttelgen zerthana ornalasqan.
Kosmetıkalyq óndiriste 49 jumys orny quryldy. Qýattylyǵy jylyna 30 mln birlikke deıin kosmetıka shyǵarýǵa múmkindik beredi. Jumystyń alǵashqy 10 aıynda 380 myńnan astam birlik shyǵaryldy, onyń ishinde sýsabyndar, kondısıoner balzamdary, dýshqa arnalǵan gelder, suıyq sabyndar, losondar, tonıkter jáne mısellıarlyq sý. О́nimder óz brendterimen (Asiya, Telli, Asia Professional), sondaı-aq iri qazaqstandyq satýshylar úshin kelisimshart boıynsha óndiriledi. Zaýyt jańa eksporttyq naryqtarǵa shyǵýǵa múmkindik beretin GMP standartynyń farmasevtıkalyq talaptaryna sáıkes salynǵan.
«Biz kelisimsharttyq óndiris retinde – ónimderimizdi klıenttiń óz brendimen shyǵaramyz. Oǵan qosa óz brendterimizdi damytamyz, olardyń quramynda 95% tabıǵı komponent bar. Biz jergilikti shópterdi qoldanamyz, syǵyndylardy óz ekstraktorymyzda daıyndaımyz jáne jaqyn arada avtorlyq shıkizatqa patentterdi rásimdeýdi josparlap otyrmyz», deıdi «Telli Ondiris» JShS dırektorynyń orynbasary Janna Baımaǵambetova.
Baspasóz týry barysynda Almatynyń ındýstrııalyq aımaǵy Respýblıkalyq mańyzy bar jetekshi óndiristik alańdardyń biri bolyp tabylatyny atap ótildi. Onyń aýmaǵynda jalpy somasy 142,1 mlrd. teńgege 41 joba iske qosylyp, 4 430 jumys orny quryldy. Iske asyrý satysynda 411,2 mlrd. teńge somasyna 66 joba bar, onda 7 453 jumys orny qurylady.
Almaty
