«Bolashaq» munaı men gazdy daıyndaý qondyrǵysy Atyraý oblysynyń Maqat aýdany aýmaǵynda ornalasqan. Qarabatan eldi mekeni tusyndaǵy qondyrǵy men Atyraý qalasynyń aralyǵy – shamamen 35 shaqyrym.
Telegram arnalarynda «Bolashaq» qondyrǵysynyń aýmaǵynda kúkirttiń jınaýly turǵany jóninde foto júkteldi. Osyǵan oraı máseleniń mán-jaıyn Atyraý oblystyq ekologııa departamentiniń baspasóz qyzmetinen surastyrdyq.
«Ekologııalyq ınspeksııa 2022 jyly North Caspian Operating Company N.V. (NCOC) kompanııasynyń jerústi keshenin tekserý nátıjeleri boıynsha birneshe buzýshylyqty anyqtady. Birinshiden, ruqsat etilgen 730 tonna kúkirttiń ornyna 1,7 mln tonna kúkirt ornalastyrylǵan. Normadan artyǵy – 1,02 mln tonna. Ekinshiden, qorshaǵan ortany qorǵaý sharalaryn oryndalmaǵan. Úshinshiden, ekologııalyq ruqsatsyz sarqyndy sýlardy aǵyzǵan. Tórtinshiden, memlekettik ekologııalyq saraptamanyń qorytyndysynda qamtylǵan talaptar saqtalmaǵan», dep habarlady departamenttiń baspasóz qyzmeti.
Alaıda, NCOC kompanııasy tekserý nátıjelerimen kelispeı, Astana qalalyq sotyna shaǵym túsirgen. Sot kompanııanyń talap aryzyn ishinara qanaǵattandyryp, uıǵarymdaǵy 10 tarmaqtyń úsheýin zańsyz dep tanyǵan.
«Astana qalasynyń ákimshilik ister jónindegi sot alqasy 2024 jylǵy 27 aqpanda ekologııa departamentiniń shaǵymyn tolyǵymen qanaǵattandyrdy. Tabıǵat qorǵaý ınspektorlary uıǵarymynyń barlyq tarmaǵy zańdy dep tanyldy. NCOC atalǵan sot qaýlysyna kassasııalyq shaǵym túsirdi. Qazir bul shaǵym Joǵarǵy Sotta qaralyp jatyr», dep málim etti departamenttiń baspasóz qyzmetinen.
Atyraý oblysy
