Sonymen bul kúnderi Almatynyń ındýstrıaldy aımaǵynda úsh birdeı jańa zaýyt paıdalanýǵa berilgendikten, osynaý ilkimdi oqıǵaǵa oraı megapolıstegi BAQ ókilderi jumysy qyza bastaǵan jańa óndiris oryndaryna baryp, radıator, kabel, kosmetıkalyq ónimder shyǵaratyn kompanııalardyń tynys-tirshiligimen tanysty.
Talaı adamǵa tabys kózin taýyp bergen zaýyttardyń iske qosylýy – Almatynyń ındýstrııalandyrý men óndiristik áleýetin damytý baǵdarlamasyn iske asyrýdyń kezekti qadamy.
Máselen, BAQ ókilderiniń joly túsken «Valtherm» JShS alıýmınıı jáne bımetall jylytý radıatorlaryn shyǵaratyn zaýytqa salynǵan ınvestısııa kólemi 10 mlrd teńgeden asady. Zaýytta kúnine 10 myńǵa deıin radıator bólikterin shyǵaratyn bes quıý mashınasy ornatylǵan. Aldaǵy ýaqytta kompanııa quıý mashınalarynyń sanyn 12-ge deıin jetkizip, óndiris kólemin jylyna 15 mıllıon seksııaǵa deıin ulǵaıtýdy kózdep otyr.
«Biz Qytaıda 20 jyldan astam radıator óndirýmen aınalysyp kelemiz. Qazir barlyq keshendi tájirıbeni Qazaqstanǵa kóshirip, tolyqqandy óndiristi iske qostyq. Biz temir synyqtaryn jınap, qaıta óńdep, daıyn ónim – radıatorlar jasaımyz. Qazirgi tańda kúnine 10 000 seksııa shyǵaramyz jáne odan ári keńeıtýdi josparlap otyrmyz», dedi «Valtherm» JShS ınvestory Iýen Sı.
Bul kásiporynda avtomobılderdegideı anaforezdi boıaý tehnologııasy qoldanylady, ol berik ári tot basýdan qorǵaıdy. Bul tehnologııa radıatorlardyń syrtqy túri men sapasyn 20 jyl boıy saqtaýǵa múmkindik beredi.
Qazirdiń ózinde «Valtherm» zaýytynyń Reseı, Ázerbaıjan, Ýkraına elderinde klıentter bazalary bolsa, keleshekte qurastyrý óndirisin Almatyǵa ornalastyrýdy qarastyryp otyr. О́ndiristiń jańa túrleri – gaz qazandyqtaryn, paneldik radıatorlar, profılder syndy basqa da óndiris oryndaryn qurý úshin 3 gektarǵa qosymsha seh salý josparlanǵan.
Sol sııaqty 2024 jyldyń aıaǵynda, jeltoqsan aıynda ındýstrııalyq aımaqta kábil-sym jelilerin shyǵarýǵa mamandanǵan «Harmony Cable» JShS kásiporny jumysyn bastaǵan bolatyn. Jobaǵa salynǵan ınvestısııa kólemi shamamen 2 mlrd teńgeni qurady. Osy zaýytty iske qosýdyń arqasynda 50 adam jumys tapqan. О́ndiris qýattylyǵy aıyna 100 tonnaǵa deıin mys óńdep, jylyna 8 mlrd teńgeden astam somaǵa 21 600 mln metrge deıin kábil men sym shyǵarýǵa múmkindik beredi.
Búgingi tańda kásiporyn otandyq qurylys kompanııalarymen, elektr taýarlaryn jetkizetin bólshek saýda oryndarymen belsendi jumys isteıdi. Taýarlardyń negizgi bóligi el ishinde satylady, alaıda kompanııa Qyrǵyzstan men Tájikstanǵa eksportqa shyǵyp, Eýropa elderine taýar tasymaldaýdy keńeıtýdi josparlap otyr.
«Biz Balqashtan satyp alynatyn otandyq mystan kábil shyǵaramyz. Qaıta óńdeý kólemi jylyna 1200 tonnaǵa jetedi. Qazir katankadan sym óndirý jelisin iske qosyp, sondaı-aq kábilderge arnalǵan plastıkat – oqshaýlaǵysh materıal óndirý qýatyn keńeıtip jatyrmyz», dedi «Harmony Cable» JShS kommersııalyq dırektory Mádı Muhanuly.
Búginde Qazaqstan mysy kóbinese Túrkııaǵa, sol jerden Eýropaǵa eksporttalady. Kompanııanyń endigi maqsaty – aralyq tizbekterdi aınalyp ótip, eýropalyq naryqqa shyǵý.
Al endi jýrnalısterdiń joly túsken kezekti kosmetıkalyq ónimder men turmystyq hımııa óndirisine mamandanǵan «Telli Ondiris» JShS zaýyty 2024 jyly qańtardan bastap jumys isteıdi. Jobanyń quny 3 mlrd teńge bolsa, onyń 465 mln teńgesin «Almaty qarjy» JShS nesıege qarjylandyryp otyr. Kásiporyn aýmaǵynda óndiristik jáne qoıma úı-jaılary, sondaı-aq akkredıttelgen zerthana ornalasqan.
Kosmetıkalyq óndiris orny da 49 mamandy jumyspen qamtyp otyr. Zaýyt jumysy jylyna 30 mln birlikke deıin ónim óndirýge múmkindik beredi. Kásiporyn qyzmetine kirisken alǵashqy 10 aıynda 380 myńnan astam ónim shyǵarylsa, onyń ishinde sýsabyn, shash balzamdary, jýynýǵa arnalǵan gel, suıyq sabyndar, loson, bet sergitetin suıyqtyqtar men mısellıarlyq sý bar. Kosmetıkalyq zattar «Asiya», «Telli», «Asia Professional» atty brendterge qosa, iri otandyq satýshylar úshin kelisimshart boıynsha óndiriledi. Zaýyt jańa eksporttyq naryqtarǵa shyǵýǵa múmkindik beretin GMP standartynyń farmasevtıkalyq talaptaryna sáıkes salynǵan.
«Biz kelisimsharttyq óndiris retinde ónimdi klıenttiń óz brendimen shyǵaramyz. Sonymen qatar brendterimizdi damyta bastadyq, olardyń quramynda 95% tabıǵı komponent bar. Kosmetıkalyq ónimder shyǵarý barysynda jergilikti shópterdi qoldanamyz, syǵyndylardy da óz ekstraktorymyzda daıyndaımyz jáne jýyrda avtorlyq shıkizatqa patentterdi rásimdeýdi josparlap otyrmyz», deıdi «Telli Ondiris» JShS dırektorynyń orynbasary Janna Baımaǵambetova.
Qoryta kelgende, jumysy qyz-qyz qaınaǵan jańa óndiris oryndaryna bastaǵan baspasóz sapary – Almaty ındýstrııalyq aımaǵy – respýblıkalyq deńgeıdegi mańyzdy jetekshi óndiristik alańdar qatarynda ekenin aıǵaqtady. Qazirdiń ózinde onyń aýmaǵynda jalpy somasy 142,1 mlrd teńgege jetken 41 joba iske qosylyp, 4 430 jumys orny quryldy. Iske asyrý satysynda 411,2 mlrd teńge somasyna 66 joba bar, onda 7 453 jumys orny qurylady.
«Almatynyń ındýstrııalyq aımaǵy» JShS bas mamany Dana Qalyqova jýrnalısterge bergen suhbatynda: «Biz turaqty damý yrǵaǵy men ınvestorlar tarapynan joǵary qyzyǵýshylyqty baıqap otyrmyz. Indýstrııalyq aımaqta memlekettik qarajat esebinen tolyq ınjenerlik ınfraqurylym, sondaı-aq yńǵaıly kólik logıstıkasy men óziniń temirjol stansasy bar», dedi.
ALMATY
