Foto: primeminister.kz
Jaz – tek demalys ýaqyty emes, alǵashqy eńbek tájirıbesin jınap, óz betimen tabys taýyp kórýge tamasha múmkindik. Svetlana Jaqypovanyń aıtýynsha, elimizde eńbek qyzmetimen aınalysýǵa zań boıynsha ruqsat etilgen 14-ten 18 jasqa deıingi oqýshylardyń sany – shamamen 1,5 mıllıon. Olardyń 26,5 myńy – múmkindigi shekteýli balalar.
Qazirgi tańda 24,3 myńǵa jýyq oqýshy jazǵy jumyspen qamtylǵan. Eń kóp jumys isteıtin salalar – saýda (5,3 myń bala) jáne turǵyn úı men qoǵamdyq tamaqtaný qyzmetteri (3,6 myń). Bul kórsetkish jyl saıyn artyp keledi.
Mınıstr bul baǵytta arnaıy onlaın quraldardyń iske qosylǵanyn aıtty. Atap aıtqanda, elektrondy eńbek bırjasynda «Meniń jazǵy kanıkýldarym» atty bólim ashylyp, 14 jastan asqan oqýshylarǵa jeke kabınet ashyp, túıindeme qaldyrý jáne ózine yńǵaıly bos jumys ornyn tańdaý múmkindigi berilgen. Tirkelý ata-analary nemese qamqorshylary arqyly júzege asady.
Sondaı-aq, Skills.Enbek platformasynda balalar túrli mamandyqtar boıynsha jańa daǵdylardy úırene alady. Qazir bul júıede 1 294 kýrs bar, onyń 322-si – tegin, al 67-si – erekshe qajettiligi bar jastarǵa beıimdelgen.
Svetlana Jaqypova jazǵy demalys kezinde jergilikti ákimdikter tarapynan qoǵamdyq jumystardy uıymdastyrý tájirıbesi jalǵasatynyn da atap ótti. Bul jumystar arnaıy daıyndyqty qajet etpeıdi, ıkemdi keste boıynsha oryndalady jáne ekonomıkalyq, áleýmettik nemese ekologııalyq paıda ákelýi tıis. Mundaı jumys úshin oqýshylarǵa aı saıyn keminde 24 AEK (2025 jyly – 94 368 teńge) kóleminde jalaqy tólenedi.
«Biz oqýshylarǵa jazǵy demalys kezinde jumys isteýge múmkindik berip qana qoımaı, olarǵa teń jaǵdaı jasaýǵa, ıkemdi eńbek sharttaryn usynýǵa tyrysamyz. Bul – olardyń bolashaq mamandyq tańdaýy men jeke damýyna úlken serpin beredi», dedi mınıstr.
Osylaısha, memleket tarapynan jasóspirimderge jumys isteýge, bilim alýǵa jáne ózin damytýǵa naqty jaǵdaı jasalyp otyr. Bul – eńbekke alǵashqy qadam, ómirge daıyndyqtyń bir bóligi.
Janel TО́LEÝBEKOVA, EUÝ 2 kýrs stýdenti
