Albına Alıagaevna – ómir joly ónegege toly ustaz. Anasy – Syr óńiriniń qasıetti Qarmaqshy aýdanynda, ákesi – Ázerbaıjan jerinde dúnıege kelgen. Eki eldiń ulandary Latvııada bilim qýyp júrip, birin-biri tapqan, ómirlik serik etken. Osyndaı tatýlyq pen dostyqty tý etken shańyraqtyń jylýlyǵynda ósken Albınanyń júregi keń, jany taza. Ol 1992 jyly otbasymen birge Qarmaqshy aýdanyna qonys aýdaryp, sodan beri týǵan jerdiń tól perzentindeı eńbek etip keledi.
Albına Gadırova tek bilikti ustaz ǵana emes, sonymen qatar ulttyq qundylyqtardy qadir tutatyn jan. Qazaq halqynyń barsha merekelerin atap ótip, salt-dástúrdi shákirtteriniń boıyna sińirýde erekshe úlgi kórsetip júr. Ol – ult pen ulysqa bólinbeıtin, beıbitshilik pen tatýlyqty tý etken eldiń shynaıy janashyry.
Ustazdyq joldy tańdaýdaǵy basty sebep – ózi bilim alǵan mektebinde qazaq tili men ádebıetinen dáris bergen súıikti ustazy Merýert Kenjegulqyzynyń úlgisi. Sol ustazynyń qoldaýymen túrli baıqaýlar men respýblıkalyq olımpıadalarǵa qatysyp, óz qabiletin shyńdaǵan. Endi ózi de shákirt tárbıeleýde sol izgilikti joldy jalǵastyryp keledi.
Qazirgi tańda Albına Alıagaevna – shákirt júregine jol taba bilgen, jańashyldyq pen ulttyq rýhty sabaqtastyra biletin tájirıbeli ustaz. Onyń memlekettik tildi úıretetin ár sabaǵy – oqýshyny oılandyrýǵa, izdendirýge, adamgershilikke tárbıeleýge baǵyttalǵan.
