Búginde Dınara Kaırgoja zamanaýı estradalyq baǵytta tyń jobalarymen kózge túsip júr. Onyń kópqyrly shyǵarmashylyq joly elimizdiń mýzyka ındýstrııasynyń damýyna eleýli úles qosýda.
Qazaqstan Kompozıtorlar odaǵynyń múshesi Dınaranyń jas urpaqty shyǵarmashylyqqa baýlýda eńbegi orasan. 2003-2008 jyldary Dınara Kaırgoja Almaty qalasyndaǵy №5 oqýshylar úıinde balalardyń estradalyq stýdııasyn basqaryp, jas talanttardyń sahnaǵa shyǵýyna jol ashyp berdi. Osy kezeńde ol balalardy tek vokalǵa ǵana emes, sahnalyq mádenıet pen akterlik sheberlikke de baýlı otyryp, bolashaq ártisterdiń kásibı ósýine negiz qalady.
«Dınaranyń mektebinen ótkenimizdi árkez maqtan tutamyz ári mýzyka álemindegi osyndaı iri tulǵadan dáris alǵanymyzǵa qýanyshtymyz. Bul - kez kelgen janǵa berilmeıtin múmkindik. Ustazymyzdyń taǵylymy, tárbıesi bizdi kıeli sahnamen tabystyrdy», - deıdi óner ıesiniń shákirteriniń biri Roza Jomartqyzy.
О́ner zertteýshileri Dınaranyń kompozıtorlyq qyryn da joǵary baǵalap júr. Ol 2009-2013 jyldary birqatar avtorlyq ánderin jaryqqa shyǵardy. «Elim meniń», «Án jumbaq», «Qyz qylyǵy» atty televızııalyq jobalarǵa arnaıy shaqyrylyp, tyńdarmandaryna ózgeshe qyrynan kórindi. Ári repertýaryndaǵy jańa ánderin kópshilik nazaryna usynyp, ulttyq mýzykalyq muraǵa ózindik úlesin qosyp keledi. Sonymen qatar respýblıkalyq deńgeıdegi baıqaýlardyń qazylar alqasynyń quramynda bolyp, jas oryndaýshylarǵa kásibı baǵyt-baǵdar berýden sharshaǵan emes.
Dınara Kaırgoja jerlesteriniń arnaıy shaqyrtýymen Kókshetaý qalasynda óziniń avtorlyq vokal stýdııasyn da ashty. Bul bastama bir jaǵynan jeke kásipkerlik joba bolsa, ekinshi jaǵynan óńirdegi shyǵarmashylyq damýǵa serpin bergen mańyzdy mádenı ortalyqqa aınaldy.
Biz Dınaraǵa habarlasyp, osy ortalyq týraly suraǵanymyzda munda ártúrli jas shamasyndaǵy shákirtter vokaldan ǵana emes, sahna mádenıeti, mýzykalyq ınterpretasııa, shyǵarmashylyq erkindik turǵysynan keshendi bilim alatynyn aıtty.
«Bul óner ortalyǵyn ashýdaǵy bir maqsatym, Aqan seri, Birjan saldardy qazaqqa bergen týǵan jerimde óner dúldúlderiniń sabaqtastyǵyn úzilmegendigin kórsetý edi. Sol maqsatqa jettim degen de oıdamyn. Munyń baǵasyn halyq beredi, al halyqtyń baǵasy joǵary», - deıdi D.Kaırgoja.
Onyń bul baǵyttaǵy jobalarynyń qataryna ýkraınalyq Fýd-master jelisiniń jarnamalyq beınejazbasyna túsken rólin de qosýymyz kerek. «Bul jobanyń irikteýinde ýkraın qyzy men meniń ónerim qazylar alqasynyń nazaryn aýdardy. Nátıjesinde ýkraınalyq kompanııanyń jarnamasyn ýkraın qyzy Reseı aımaǵyna jasasa, meniń beınejazbam Qazaqstan, О́zbekstan, Qyrǵyzstan elderindegi tutynýshylarǵa baǵyttaldy», - deıdi Dınara Kaırgoja.
Mýzykalyq ortada Dınara Kaırgoja – tek ánshi emes, otandyq estradadaǵy yqpaldy tulǵa, jańa býyndy qalyptastyrýshy pedagog, óner arqyly tárbıeleýdiń zamanaýı modelin usynǵan kásibı maman.
