Foto: gov.kz
Osakarov kentinde «Gıperboreıa» JShS quny 42,6 mıllıard teńge turatyn jel elektr stansııasyn ornatyp jatyr. Aýdanda jalpy quny 301 mıllıard teńge turatyn úsh ınvestısııalyq jobany júzege asyrý josparlanǵan. Olar: «Gıperboreıa» JShS salatyn, qýattylyǵy 150 MVt jel elektr stansııasy, Qytaı men Qazaqstannyń birikken «Altyn Alqap Krg» JShS salatyn kirpish zaýyty jáne Qytaı men Qazaqstannyń birikken «North wind park» JShS salatyn, qýattylyǵy 500 MVt jel parki. Iri ınvestısııalyq jobany júzege asyrý úshin jer telimi berildi.
Qýaty 150 MVt quraıtyn jańa jel elektr stansııasynyń qurylysy júrip jatyr. Jańa stansııa árbir nomınal qýaty 7,7 MVt bolatyn 21 jel energetıkalyq qondyrǵysynan turady. Budan bólek, oǵan qosalqy stansııa, soǵan sáıkes ınfraqurylym salynyp, sondaı-aq elektr jetkizý jelileri tartylyp jatyr. Stansııanyń qurylysyna álemdik jel týrbınalaryn óndirýshi jetekshi kompanııalardyń biri – germanııalyq «Siemens AG» kompanııasynyń elektr jabdyǵy paıdalanyldy.
Jańa JES óndiristik sıpattamalarynan bólek, joba óziniń ekologııalyq qurylymy turǵysynan óńir úshin mańyzdy. Elektr stansııasyn salý jáne ony iske qosý gaz ben kómir shyǵaryndylaryn azaıtýǵa múmkindik beredi.
Munymen qosa, Qytaı óndirisiniń elektrli týrbınalary qurylys kádesine qoldanylyp jatyr. Stansııa basshylyǵynyń aıtýynsha, jel men kúnnen energııa kózin alýdan Qytaı kósh bastap turǵan kórinedi. Sol sebepti, qytaılyq áriptesterimen baılanys ornatyp, solar usynǵan jabdyqtardy qoldanyp otyrǵan kórinedi. Sáıkesinshe, sapasy ozyq ónerkásip ornynyń kepildigin alypty. Al, nemis fırmasynyń jabdyǵy jıyrma jyl úzdiksiz qyzmet kórsetip beretinderine senimdi.
«Jasyl energetıka kómir otynynsyz, gazsyz ári qaýipsiz toq kózi. Biz jalpy stansııanyń qurylysyn qys túskenshe aqtaımyz dep otyrmyz. Negizgi merzimimiz kelesi jyldyń kóktemine deıin. Qazirdiń ózinde 7 jel energetıkalyq qondyrǵysyn ornattyq. Jalpy qoıylatyn qondyrǵy sany – 21-di quraıdy. Aıta ketkenimiz abzal, bul alań Eýropadaǵy teńdessiz jel stansııasyna aınalady. О́ıtkeni, ınnovasııalyq eń ozyq jabdyqtardy paıdalanyp jatyrmyz. Júıe tolyq avtomattandyrylady. Jelge kompıýterdegi operator monıtorıng júrgizedi. Qazir 150 adamǵa jumys berip otyrmyz», – deıdi«Gıperboreıa» JShS tehnıka jónindegi dırektory Dmıtrıı Sılantev.
Elektr nysany iske qosylǵan soń 20 jańa jumys orny qurylady. Osy sekildi Temirtaýda 500 MVt jáne Qarqaraly aýdanynda 200 MVt jel elektr stansııasyn salý josparlanǵan. Jobalar pysyqtalyp jatyr.
Qysqasy, jel energııasy eń serpindi damyp kele jatqan jańartylatyn energııa kózderiniń biri. Jalpy, el aýmaǵynda jel resýrstary keń taralǵan. Sondyqtan jel energııasyn paıdalaný kómir jáne gaz elektr stansııalary óndiretin elektr energııasyn tasymaldaý qunymen salystyrǵanda ekonomıkalyq turǵydan tıimdi ekenin aıtady energetıka mamandary.
Qaraǵandy oblysy
