Búgingi tańda Esken Sergebaevtyń qolynan shyqqan músinder el kólemindegi mańyzdy eskertkishterge aınalǵan. Atap aıtqanda, Ábý Nasyr ál-Farabı, Abaı tulǵasy men Áýezov beınesi, Jambyl aýdanyndaǵy N.Tilendıev, Aqtóbedegi Ábilhaıyr han, Pavlodardaǵy S.Toraıǵyrov, «Dos-Muqasan» ansambline arnalǵan eskertkishteri men tarıhı janrlyq úlgimen jasalǵan Abylaı han, Qazaqstannyń halyq ártisi, rejısseri A.Toqpanov, halyq ártisi Q.Qýanyshbaev, kompozıtor Á.Beıseýov músinderiniń avtory. Sonymen qatar, I.Jansúgirov, K.Ázirbaev, D.Qonaev eskertkish bıýstterimen qatar, О́ner akademııasy alanyndaǵy T. Júrgenov bıýsti de E.Sergebaevqa tıesili. Bular músinshiniń qoltańbalyq erekshelikteri men kórkemdik tujyrymyn tanytatyn erekshe týyndylar.
Akademııanyń galereıasynda ashylǵan kórmege Esken Sergebaevtiń ár jyldardaǵy shákirtteri, búgingi tańda tanymal bolǵan otandyq sýretshiler men músinshiler Baýyrjan Baıdilda, Bolat Turǵynbaı, Edýard Kazarıan, Nurǵalym Isabaev, Talǵat Serikbaev, Qazybek Dýlatov, Dáýren Muhamedjanov, Aqylbek Ormanbekov, Sabyr Qonarbaev, Talǵat Jumaǵulov, Tımýr Ermuhametov, Aıdos Búrkitbaev, Gaýhar Qasenbaı, Danııar Sarbasov, Tursyn Qapaqov, Bahtııar Qaıranbaev jáne taǵy basqa avtorlardyń shyǵarmashylyq jumystary qoıyldy.
«E. Sergebaev – HH ǵasyrdyń ekinshi jartysynan bastap elimizdegi kásibı músin óneriniń baǵyt-baǵdaryn aıqyndaǵan, ózindik avtorlyq qoltańbasy qalyptasqan sýretshi. Onyń shyǵarmalarynyń taqyryptyq aýqymy keń: tarıhı tulǵalar men halyq qaharmandarynyń beınesinen bastap, zamanaýı obrazdar men sımvolıkalyq sheshimderge toly baǵytta izdenis jasaǵan. Avtordyń eńbekterinde monýmentaldy tutastyq, plastıkalyq naqtylyq pen tereń fılosofııalyq mán úndesip jatady. Ol ulttyq rýhty, tarıhı jadyny, adam bolmysynyń ishki mánin kórkem tilmen beınelegen sýretker retinde tanymal. Onyń árbir týyndysy óz dáýiriniń kórkem shejiresi ispettes»,- deıdi ónertanýshy-ustaz Láılá Kenjebaeva.
Akademıktiń shákirtteri men áriptesteri uıymdastyrǵan mádenı ári ǵylymı mańyzy zor is-sharaǵa qatysqan zııaly qaýym, ulttyq beıneleý óneriniń ótkeni men búginine qatysty ózekti máselelerdi saralady.
