Qazaqstannyń Avstrııadaǵy elshisi Qaırat Sarybaı jaqynda Karıntııa avstrııalyq federaldyq jerinde jumys saparymen boldy, dep habarlady SIM baspasóz qyzmeti.
Sapar barysynda federaldyq óńirdiń saıası basshylyǵymen, iskerlik jáne mádenı toptarymen, atap aıtqanda, Jer parlamentiniń prezıdenti Raınhart Rormen, Karıntııanyń Jer úkimeti basshysynyń orynbasary Beate Prettnermen, jetekshi ónerkásip kompanııalarynyń ókilderimen, sondaı-aq, Fıllahe qalasynyń folklorlyq festıvaliniń uıymdastyrýshylarymen kezdesýler ótti.
Karıntııa basshylyǵymen kezdesýler kezinde avstrııalyq tarap Qazaqstannyń saıası jáne ekonomıkalyq jaǵdaıy, bes ınstıtýttyq reforma men ony júzege asyrý boıynsha «100 naqty qadam» aıasynda elimizdiń ilgeri damý jospary týraly jáne EKSPO-2017 halyqaralyq mamandandyrylǵan kórmege daıyndyq, «Nurly Jol» baǵdarlamasyn iske asyrý, 2017 jylǵy Qysqy ýnıversıadany ótkizý sheńberinde Qazaqstanmen yntymaqtasý múmkindikteri týraly habarlandy.
Q.Sarybaı Karıntııanyń Qazaqstanmen yntymaqtastyǵyn ońaltýǵa múddeli jetekshi ındýstrııalyq kompanııalar basshylyǵymen kezdesip, olar Qazaqstandaǵy óz jobalary men josparlary jóninde aqparat berdi. Avstrııalyq iskerlik toptar ókilderi EKSPO-2017 halyqaralyq kórmesine qyzyǵýshylyq tanytyp, onyń «bolashaq energııasy» atty taqyryby Karıntııanyń energııanyń ekologııalyq taza jáne jańartylmaly túrlerin damytýda zor tájirıbesi bar fırmalarynyń múddelerine saı dep atap ótti. Karıntııa qysqy sport túrlerin damytýda tájirıbesi mol, onyń ishinde «Bellutti Planen Klagenfurt GmbHS» kompanııasy Almaty qalasynda 2017 jylǵy Qysqy ýnıversıadany daıyndaýǵa atsalysýda.
«Egemen-aqparat».
