Kásipkerlikti damytý – ulttyq ekonomıkanyń turaqty ósýiniń mańyzdy faktorynyń biri. О́tken jyldyń 4 toqsanynda eldiń IJО́-degi ShOB úlesi 39,7%-dy qurady. Bul burnaǵy jyldyń sáıkes kezeńimen salystyrǵanda 3,2%-ǵa artyq. Sektorda jumyspen qamtylǵandar sany 2,2%-ǵa artyp, 4,4 mln adamǵa jetti. ShOB sýbektileriniń ónim shyǵarý kólemi 81 trln teńgeni qurady, bul ótken jyldyń osy kezeńindegi kórsetkishten 19,2%-ǵa joǵary.
«Damý» qorynyń qatysýymen iske asatyn kásipkerlikti qoldaýdyń qoldanystaǵy keshendi baǵdarlamasy sheńberinde «Bıznestiń jol kartasy» men «Qarapaıym zattar ekonomıkasy» baǵdarlamasynyń quralyn belsendi iske asyrý jalǵasyp jatyr», dedi Ortalyq kommýnıkasııalar qyzmetinde ótken baspasóz maslıhatynda Ulttyq ekonomıka mınıstrligi Kásipkerlikti memlekettik qoldaý jáne qorǵaý departamentiniń dırektory Daryn Ábdýáli.
Ol brıfıngte eldegi shaǵyn jáne orta bıznesti memlekettik qoldaýdyń negizgi nátıjeleri men jańa sharalary týraly aıta kelip, ótken jyldyń qorytyndysy boıynsha kredıtterdi sýbsıdııalaý arqyly jeńildetilgen qarjylandyrý sharalarymen jalpy somasy 1 trln teńgege 7 myńnan astam bıznes-joba qamtylǵanyn atap ótti.
Onda kepildikter 310 mlrd teńge somasyna 8 myń jobaǵa berilipti. Endi bıyl osy maqsattarǵa 275,2 mlrd teńge, onyń ishinde respýblıkalyq bıýdjetten 196,4 mlrd teńge, jergilikti bıýdjetterden 78,8 mlrd teńge baǵyttaý josparlanyp otyr. Jobalardyń deni Almaty, Astana, Shymkent qalalarynda, sondaı-aq Almaty, Túrkistan, Aqtóbe oblystarynda iske asyrylady.
Salalar boıynsha óńdeý ónerkásibi, kólik jáne qoımalaý, bilim salalary basym. Qarjylyq emes qoldaý sharalary da belsendi damýdy jalǵastyryp keledi. Byltyrǵy jyly 15 myń servıstik qyzmet kórsetildi, bıznesti júrgizýge qatysty 135 myńnan astam konsýltasııa usynyldy.
Qoldaý Kásipkerlerge qyzmet kórsetý ortalyqtary arqyly da, onlaın – mamandandyrylǵan portal arqyly da kórsetiledi. Qoldaýdyń neǵurlym naryqtyq tetikterine kóshý sheńberinde keshendi baǵdarlamaǵa ózgerister engizildi. Atap aıtqanda, portfeldik sýbsıdııalaý men «Damý» qory bazasynda jańadan qurylatyn óńirlik kepildik qorlary arqyly kepildik berý, qarjylandyrý týraly sheshimderdi qabyldaý jónindegi ókilettikti tikeleı ekinshi deńgeıdegi bankterge berý – barynsha jaǵymdy jańalyq. Bul ótinimderdi qaraýdy jedeldetý men bıznesti qoldaýdyń tıimdiligin arttyrýǵa múmkindik beredi.
«ShOB sýbektilerine jyldyq 12,6% mólsherlemesimen jeńildetilgen qarjylandyrýdyń jańa baǵdarlamasy qosymsha ázirlenip jatyr. Kredıtter qosa qarjylandyrý tetikteriniń qatysýymen ekinshi deńgeıdegi bankter arqyly beriletin bolady. Eń joǵary lımıt bir qaryz alýshyǵa nemese baılanysty qaryz alýshylar tobyna 7 mlrd teńgege deıin bolady», dedi D.Ábdýáli.
Munymen qosa departament dırektory memleket budan bylaı shaǵyn jáne orta bıznesti qoldaýdy dáıekti túrde kúsheıtip, qarjylyq jáne qarjylyq emes quraldarǵa qoljetimdilikti keńeıtip, kásipkerlik belsendilikke qolaıly jaǵdaı týǵyzatynyn atap aıtty.
