Merekelik kóńil kóńil kúı mektep aýlasyna kirgen sátte-aq sezildi. Ári qaraı synypta ótkizilgen biryńǵaı synyp saǵattaryna qatysyp, oqýshylarmen tildestik. 1-synyptan 11-synypqa deıin uıymdastyrylǵan tárbıe saǵaty «Bilimim – Otanyma» atty ortaq taqyryp aıasynda ótti. Synyp saǵaty barysynda oqýshylarǵa otanshyldyq rýhty oıatatyn, bilim men eńbekke degen qurmetti dáripteıtin baıandama jasalyp, qyzyqty oıyndar ókizildi. Muǵalimder men synyp jetekshileri elge qyzmet etý, adaldyq pen jaýapkershilik syndy asyl qundylyqtardy oqýshylarǵa jete túsindirdi. Is-shara barysynda «Birtutas tárbıe» jobasynyń aıasynda oqýshylar arasynda ótkizilgen esse baıqaýynyń jeńimpazdary anyqtalyp, úzdik dep tanylǵan oqýshylar marapatqa ıe boldy.
«Búgin, mine, oqý jylynyń qorytyndysyn «Bilimim – Otanyma» synyp saǵatymen túıindedik. Synyp saǵatynda «Adal azamat» birtutas tárbıe baǵdarlamasynyń qundylyqtaryna basymdylyq berip, túrli formatta ótkizdik. О́tken aptadan beri bastalǵan esse baıqaýynyń nátıjesin shyǵaryp, úzdik jazylǵan jumystardy marapattadyq. Oqýshylarǵa tanymdyq kitaptar men fılmderdiń tizimi berilip, demalys kezin tıimdi ótkizý usynyldy. Qaýipsizdik sharalary boıynsha da aldyn ala jumystar júrgizilip, beınematerıaldar kórsetildi», dedi Astanadaǵy Abaı Qunanbaıuly atyndaǵy №87 mektep-gımnazııasynyń dırektory Aıgúl Kashaeva.
Mekteppen qoshtasý – ár jasóspirimniń ómirindegi úlken beles. Bul kún – balalyqtyń artta qalyp, bolashaqqa qadam basar sáti. Sol sátte júrekti qobaljý men tolqý, qýanysh pen qımastyq qatar baýraıdy. Abaı Qunanbaıuly atyndaǵy №87 mektep-gımnazııasynyń bıylǵy túlegi Myqtybek Ilııas ta dál osyndaı sezimdi bastan ótkerip otyr. «Mine, ózimniń mekteptegi ómirimen qoshtasar sátke de jettim. Jalpy, bul jyl da jyldaǵydaı erekshe ótti. Synyptastarymmen birge ótkizgen árbir sát – men úshin óte qymbat. Oqý jylynyń aıaqtalýyna baılanysty mektebimizde barlyq synypta «Bilimim – Otanyma» atty biryńǵaı tárbıe saǵaty ótti. Bul ashyq sabaqta bizge eń aldymen adal bolýdyń mańyzdylyǵy, Otanǵa degen súıispenshilik, adaldyqpen elge qyzmet etý týraly taǵylymdy oılar aıtyldy. Tárbıe saǵaty bizge úlken ómirge qadam basar aldyndaǵy jaýapkershilikti tereńirek sezindirdi. Alda úlken armanym bar. Qazaq ulttyq О́ner ýnıversıtetine túsip, akterlik sheberlik mamandyǵy boıynsha bilim alǵym keledi. Ustazdaryma alǵysym sheksiz. Mektebimniń arqasynda Abaıdyń shyǵarmashylyǵymen tanysyp, 45 qara sózin jattadym. Qazir osy Abaı shyǵarmalary – meniń rýhanı azyǵym», deıdi I. Myqtybek.
Sonymen qatar synyp saǵatyna Astana qalalyq ádistemelik ortalyǵynyń mamany Gúlzıra Álıakbarqyzy arnaıy qatysyp, oqý jylyn úzdik aıaqtaǵan birqatar oqýshylarǵa gramotalar tabystady. Osylaısha, oqýshylardyń bir jyl boıǵy eńbegi men jetistikteri baǵalandy. «Bilim bolashaqtyń bastaýy. Jyl boıy ótkizilgen barlyq synyp saǵaty tek tárbıe emes, oqýshynyń tulǵalyq damýyna yqpal etetin mańyzdy alańǵa aınaldy. Árbir saǵatta biz oqýshylardyń boıyna qundylyqtardy sińirip, ómirlik baǵyt berdik. Endi osy bilim men tárbıeni jazda oı eleginen ótkizip, kelesi jylǵa jańa maqsatpen oralsa, naǵyz jetistik osy», dedi G.Álıakbarqyzy.
Bıylǵy oqý jylyn aıaqtap bilim jolyndaǵy taǵy bir belesti baǵyndyrǵan oqýshylar estelik fotoǵa túsip, mektebimen qımaı qoshtasyp barady. Alda – jazǵy demalys pen jańa maqsat. Al mektep bitirýshi túlekter úshin – úlken ómirge bastar alǵashqy qadam.
