Aıtysqa jınalǵan jurt ortalyq foıesindegi óńirdiń óner men mádenıet salasyndaǵy jetistigine arnalǵan kórmemen tanysty. Kórme tórine «Altyn dombyra» saıysynda úsh márte ozyq shyqqan Syr júırigi Muhtar Nııazov pen byltyrǵy saıysta jerlesterin qýantqan Meıirbek Sultanhannyń, jyl basynda jas aqyndar arasyndaǵy «Kúmis dombyra» aıtysynda úzdik dep tanylǵan Beksultan Orynbasardyń tabysy – qos altyn, bir kúmis dombyra qoıyldy. Myń oryndyq zalǵa syımaı, sóz dodasyn túregep turyp tamashalaǵandar kóp boldy.
Memleket jáne qoǵam qaıratkeri Saýytbek Abdrahmanov tóraǵalyq etken qazylar alqasynyń quramynda Qazaqstannyń Eńbek eri, Qazaqstannyń halyq ártisi Asanáli Áshimov, Qazaqstannyń eńbek sińirgen qaıratkeri Júrsin Erman, Memlekettik syılyqtyń laýreaty, aqyn Ǵalym Jaılybaı, Mádenıet salasynyń úzdigi, Aqmola oblystyq tarıhı-ólketaný mýzeıiniń dırektory Qudaıberli Myrzabek, Qazaqstannyń eńbek sińirgen qaıratkeri Almas Almatov, sondaı-aq aıtysker aqyn, fılologııa ǵylymdarynyń kandıdaty, Qazaqstannyń eńbek sińirgen qaıratkeri Mels Qosymbaev boldy. Parlament Májilisiniń depýtaty, Qazaqstannyń eńbek sińirgen qaıratkeri Amanjol Áltaı júrgizgen sóz dodasynda oblys ákimi Nurlybek Nálibaev Qyzylordanyń el baıtaǵy atanǵan kezeńiniń 100 jyldyǵy asyl muramyz aıtyspen bastalyp jatqanyn jaqsy yrymǵa balaıtynyn aıtty.
«Memleket basshysy Býrabaıda ótken Ulttyq quryltaıda kelesi, V otyrysty Syr boıynda, kezinde qazaq eliniń astanasy bolǵan Qyzylorda qalasynda ótkizýdi usyndy. Alqaly jıynda qabyldanǵan bul tarıhı sheshim aımaq jurtshylyǵynyń mereıin asqaqtatty. Bul – biz úshin zor mártebe, Prezıdentimizdiń óńirimizde atqarylǵan jumysqa bergen oń baǵasy dep bilemiz. Qazaqylyqtyń qaımaǵy buzylmaǵan, birlik pen ult tutastyǵynyń altyn dińgegine aınalǵan qasıetti Syr óńirine kelgen qadamdaryńyz qutty bolǵaı!», dedi oblys basshysy.
Eldiń ár óńirinen jınalǵan 12 aqyn baq synasqan aıtysta ár jupqa taqyryp berilip, el aldyna birinshi Meıirbek Sultanhan men shyǵystyń shań juqtyrmas júırigi Rústem Qaıyrtaı shyqty. Sózin zamanynda bar qazaqqa qadiri bólek Qunanbaıdyń Syrǵa sapar shekkeninen bastaǵan Meıirbek ejelgi izben kelip otyrǵan qarsylasyna sáttilik tiledi. «Saǵan da bóten emes Syrdyń eli, sóıleı ber sahnada sarsań bolmaı» degen Meıirbekke Rústem túıdektete jaýap berdi.
Kelesi jup – Jansaıa Mýsına men Maqsat Ahanovqa berilgen taqyryp Shámshi Qaldaqovtyń 95 jyldyǵy boldy. Taqyrypty ádemi ázilmen ádipteı taratqan ejelgi qarsylastardyń óneri kópti tánti qyldy. Aıtysty «Úsh dáýirdiń astanasy – Syr eli, munda adam baqytty ómir súredi» dep aıaqtaǵan Jansaıa men Maqsattyń óneri teń baǵalandy. Aqtóbeden kelgen Nurbol Jaýynbaev pen shymkenttik Nurmahan Jaqypbektiń sóz saıysy da zaldaǵy jurtty bir serpiltip tastady.
Syr eliniń maqtanyshy Muhtar Nııazov pen aıtys sahnasyna uzaq úzilisten keıin qaıta oralǵan Sara Toqtamysovanyń, Bekarys Shoıbekov pen Dıdar Qamıevtiń, Aspanbek Shuǵataı pen ónerdegi jolyn jańa bastaǵan Zlıqa Naýryzalına arasyndaǵy sóz saıysyn tapjylmaı tamashalaǵan jurt dástúrli ónerge qapysyz qurmet tanytty.
Tańnań keshke deıin jalǵasqan alaman aıtystyń bas júldesi Sara Toqtamysovaǵa buıyrdy. I oryn Meıirbek Sultanhanǵa, II oryn Muhtar Nııazovqa, al III oryn Rústem Qaıyrtaı men Maqsat Ahanovqa berildi. Jansaıa Mýsına men Bekarys Shoıbekov arnaıy júldemen marapattalsa, Dıdar Qamıevke, Aspanbek Shuǵataıǵa, Zlıqa Naýryzalınaǵa, Nurbol Jaýynbaev pen Nurmahan Jaqypbekke 500 myń teńgeden syıaqy tabystaldy.
Qyzylorda
