Aýyl sharýashylyǵy basqarmasynyń basshysy Ánýar Tólebekovtyń aıtýynsha, oblysta 5,4 mln gektar aýyl sharýashylyǵy jerlerin zertteý kózdelgen.
Aqtoǵaı aýdanynyń turǵyndary áleýmettik jelilerde zııankester qaptap ketkenine shaǵymdandy. Bul oblystyq shtabtyń oqıǵa ornyna baryp, shegirtkemen kúres jumystaryn baqylaýdy kúsheıtýge sebep boldy. 21 mamyrda aýdanda fıtosanıtarııalyq dıagnostıka jáne aýmaqtyq ınspeksııa mamandarynyń qatysýymen kóshpeli keńes ótti.
«Sharalar qabyldandy. Tehnıka daıyn, qajetti dári-dármek qory bar. Respýblıkalyq fıtosanıtarııalyq dıagnostıka jáne boljamdar ádistemelik ortalyǵynyń oblystyq fılıalynyń mamandary aýyl sharýashylyǵy maqsatyndaǵy jerlerdi kóktemgi zertteý jumystaryn júrgizip jatyr. Shegirtkeniń tabyndyq emes túrleri boıynsha aýmaqty óńdeý 27 mamyrda bastalady. Jumystardy avıasııany qoldana otyryp, merdiger uıymdar júrgizetin bolady. 83,45 myń gektar jer óńdelýge jatady», dep habarlady Ánýar Tólebekov.
20 mamyrdan bastap ıtalıandyq prýs túrlerin qosa alǵanda úımelep júretin shegirtkelerge qarsy hımııalyq óńdeý jumystary júrgizilip jatyr.
Jumys toǵyz jer ústi búrikkish, eki asa jeńil ushaq, deltaplan jáne tórt agrodronnyń kómegimen oryndalyp jatyr.
Qaraǵandy oblysynyń ákimi Ermaǵanbet Bólekpaev barlyq jumys oblystyq shtabtyń baqylaýynda ekenin, sondaı-aq aqparattyq vakýým bolmaýy úshin turǵyndardy júrgizilip jatqan jumystar týraly habardar etý qajettigin atap ótti.
«Biz jedel áreket ettik. Barlyq is-shara keste boıynsha oryndalady, jaǵdaı turaqty rejımde baqylanady. Basty mindet – aýyl sharýashylyǵy óndirýshileriniń sharýashylyqtarynda bolýy múmkin zııannyń aldyn alý», dedi óńir basshysy.
