Jaqynda S.D.Asfendııarov atyndaǵy Qazaq ulttyq medısınalyq ýnıversıtetiniń klınıkasynda «Qazaq handyǵynyń 550 jyldyǵyn» merekeleý aıasynda memleket jáne qoǵam qaıratkerleri, dańqty sportshylar men ónerpazdardyń qatysýymen áleýmettik aksııa – «Ashyq esik kúni» ótti.
«Elbasy N.Á.Nazarbaevtyń usynysymen bıyl «Qazaq handyǵynyń 550 jyldyǵyn» búkil el bolyp atap ótkeli otyrmyz. Osy oraıda, S.D.Asfendııarov atyndaǵy Qazaq ulttyq medısınalyq ýnıversıtetiniń klınıkasy da belsendilik tanytyp, Prezıdentimizdiń bastamasyn qoldap, búgingi áleýmettik is-sharany – «Ashyq esik kúnin» uıymdastyryp, ótkizip otyr. Bul sharamyzǵa 100-ge jýyq adamdy shaqyryp, tegin medısınalyq qyzmet kórsetpekshimiz. Aksııanyń negizgi maqsaty – elimizdiń ósip-órkendeýine, ataq-dańqynyń shyǵýy men halyqaralyq dárejesiniń kóterilýine bar kúsh-jigeri men qajyr-qaıratyn jumsaǵan, halqy úshin aıanbaı eńbek etip, ter tókken elimizdiń abyroıly azamattaryna laıyqty syı-qurmet kórsetý», – dedi óz sózinde atalmysh klınıkanyń dırektory Janar Ǵubaıdýllına.
Ýnıversıtettiń klınıkasy kópbaǵytty dıagnostıkalyq ortalyq bolyp tabylady. Klınıka negizinde aýqymdy keńestik-dıagnostıkalyq ortalyq, mamandandyrylǵan stasıonarmen jabdyqtalǵan, búgingi kúndegi Almaty qalasyndaǵy birden-bir dıabet ortalyǵy men nevrologııa bólimi jáne respýblıkamyzda alǵashqy ret navıgasııalyq júıe qoldaný arqyly qaýipsiz ári jeńil túrde jedel kómek kórsetýge beıimdelgen Lor ortalyǵy qyzmet jasaıdy. Sonymen qatar, klınıka aıasynda dúnıejúzindegi 69 memlekettiń joǵary bilikti professorlarynyń aqyl-keńesin alý múmkindigi qarastyrylǵan. «Klınıka ujymyna óz alǵysymdy bildirgim keledi. Búgin bizge óte joǵary deńgeıde qyzmet kórsetilýde. «Denniń saýlyǵy – bastyń baılyǵy» demekshi, árqashanda densaýlyq saqtaý máselesine úlken mán berilip, basty nazarda turǵan. Mundaı ıgi sharalardyń maǵynasy orasan zor. Osy oraıda, búgingi aksııanyń uıymdastyrýshylaryna tek rızashylyǵymdy bildirip, úlken alǵysymdy aıtamyn. Densaýlyq saqtaý salasyndaǵy eńbekterińiz jana bersin, halqymyz aman bolsyn», – dedi fılologııa ǵylymdarynyń doktory, Ulttyq ǵylym akademııasynyń akademıgi, qazaq tili salasynyń mamany О́mirzaq Aıtbaev. Klınıkanyń dırektory Janar Ǵubaıdýllınanyń aıtýynsha, mundaı sharalar aldaǵy ýaqytta óz jalǵasyn tabatyn bolady.
Sharafaddın ÁMIROV, «Egemen Qazaqstan».
ALMATY.
