Qaýipke aınalǵan qurylys

Osy jerde «Sol­nech­nyı» atty emdeý-saýyqtyrý oryny da ornalasqan. Onda turǵyndar em qabyldaıdy, jas balalar osyndaǵy sport zalynda túrli seksııalarǵa qatysady. Jalǵyz-aq, 2024 jylǵa deıin osy jerdiń durys joly bolmaı, jańbyr jaýsa mıy shyǵyp jatatyn. Áıteýir, ákimdik ony da túzetip, byltyr tamasha jol saldyrdy.

Alaıda turǵyndardyń da, dem alýshylardyń da, em alý­shy­lardyń da qýanyshy uzaq­qa barmady. «Solnechnyı» sana­torııinen ári Esildiń jar­qabynan jer alǵan bireýler osyn­daǵy qalyń aǵashty otap, kópqabatty úılerdiń qu­rylysyn bastap jatyr. Aǵash­tar kezinde jarqabaqty opyrylyp ketýden saqtaý úshin egilgen. «Sý qorǵanysy» atalatyn aımaqqa kópqabatty úı salýǵa kim ruqsat bergeni belgisiz. Qurylys salýǵa alynǵan aýyr tehnıkalar, qytaıdyń «Shahman» atty qurylys materıaldary men qıyrshyqtas tasıtyn aýyr júk mashınalary, júk kótergishter jarqabaqqa qaraı aǵylyp jatyr. Shetke salynǵan bir jekemenshik kottedjdiń qabyrǵalaryna jaryq ta túsken. Turǵyndar ákimdikke, tıisti organ­darǵa shaǵym jasaǵanmen, jaýap joq. Kólik ınspeksııasy qyzmetinen ǵana adamdar kelip ketkenimen, esh qaıran qyla almaǵan.

Kezinde Esildiń osy jaǵalaýy­na bóget salyp, ony betondap bekitip, boıymen jaıaýlar tynys­tap, velosıpedshiler seıildep júretin arnaıy joldar jasalady degen edi. Qalanyń Bas josparyna da solaı engizilgen.  Alaıda onyń biri de istelgen joq, kerisinshe úı salýǵa jer berý bas­taldy. Buǵan turǵyndar qarsy shyǵyp, baspasózde jazylyp, shý kóterilgennen keıin eshkim kútpegen solaqaı sheshim qabyl­dan­dy. Ol jaǵdaıdy túzet­ken emes, búldirgen sheshim boldy. Bas jospardy qaıta túzetip, úı salýǵa jer alǵandardyń isin zań­dastyryp berdi.

Sóıtip, Esildiń jarqabaǵy ekologııalyq turǵydan búlinip, bolashaqta opyrylý qaýpi bar qaterli orynǵa aınalyp barady. Jarqabaqqa urǵan tolqyndar ony jyldan jylǵa opyryp, sýǵa tartyp barady. Ásirese bıylǵydaı qatty tolqyndar ony mújı tústi. Osyny kórip júrse de «qudireti kúshtiler» aıylyn jııar emes. Qazir olardyń tehnıkalary tipti «Jeńis saıabaǵyna» qaraı ótetin joldardyń asfaltyn da ishinara ezip jibergen. Merekege keletin ardagerler, turǵyndar taǵy da bul jerdiń sazyn keshýge májbúr. Asfaltty saqtaý úshin jol salatyndar beton bloktaryn kóldeneń qoıǵan eken, ony da áldebireýler aldyryp tastapty. Qazir esh kedergisiz aǵylǵan tehnıkalar men mashınalar ekpininen jańylar emes.

Osylardyń kesirinen Esildiń jaǵalaýy da jınal­maı, qoqys qaptap ketken. Aýyr mashı­na­lar­dyń tumsa tabıǵat­tyń ekologııasyn aıamaı taptaǵanyn kórip jaǵalaýǵa kelip demalýshylar da ishken tamaǵynyń qaldyǵyn, qaǵazdaryn, paketterin shashyp, tastap ketedi. Buryn jurttyń bári de tazalyqqa umtylyp, artyn jınap ketse, qazir kerisinshe isteýge qumar. Osy jerdegi sý aıdaıtyn munaranyń mańyn da qoqys ornyna aınaldyrǵan. Demalys aımaǵynda osyndaı bassyzdyqtar bolyp otyr. Osyǵan tyıym salatyn bir organ bolar ma eken deıdi turǵyndar.

PETROPAVL