Foto: pavlodarnews.kz
Oqý-aǵartý mınıstrliginiń málimetinshe, Danııl - álem boıynsha tehnıkalyq quzyrettilikti rastaýdyń qatań talaptarynan súrinbeı ótken sanaýly stýdentterdiń biri.
Qazir Danııl Bart Pavlodar aqparattyq tehnologııalar kolledjiniń 3-kýrsynda oqıdy. Baǵdarlamalaýǵa qyzyǵýshylyǵy mektepte paıda bolyp, kolledjde túrli baıqaýlar men hakatondarǵa belsendi qatysyp júr.
Al onyń Google kompanııasymen seriktestigi 2023 jyly kolledjdiń 1-kýrsynda bastalǵan. Ol Qazaqstanda Google uıymdastyrǵan tehnıkalyq is-sharalar men baıqaýlardy ótkizetin komanda quramyna da kirgen.
«Konferensııa jáne odan keıingi taǵylymdama jasandy ıntellekt, Android, bultty platformalar men veb-tehnologııalar salasyndaǵy ozyq bilimge jol ashady. Men osyndaı deńgeıdegi sharaǵa elimniń atynan qatysatynyma qýanyshtymyn», deıdi Danııl Bart.
Aıta keteıik, pavlodarlyq stýdent 2023 jyly WorldSkills Kazakhstan baıqaýynda «altyn» júlde jeńip alǵan. 2024 jyly Iranda ótken halyqaralyq týrnırde úzdik ondyqqa engen. Sondaı-aq ol «Táýelsizdik ulany» syılyǵynyń laýreaty jáne Google qaýymdastyǵy aıasynda birqatar jobalardyń avtory.
