Foto: ashyq derekkóz
Onyń aıtýynsha, aldyńǵy búıirlik terezelerge tonırovka jasaý quqyǵyn aqshaǵa satý – bıýdjetke turaqty tabys kózine aınalýy múmkin. Ulttyq statıstıka bıýrosynyń deregine súıengen depýtat 2024 jyldyń 1 mamyryna deıin elde 6,1 mıllıon kólik tirkelgenin, onyń 86,5 paıyzy jeńil kólikter ekenin aıtty.
«Avtoparktiń tek 5 paıyzy ǵana bul ruqsatty satyp alǵan kúnniń ózinde, ortasha baǵa 50 AEK (196 600 teńge) bolsa, jyl saıyn bıýdjetke 50 mıllıard teńgeden astam qarajat túsedi. Bul qarajatty jol ınfraqurylymyn damytý men jóndeýge baǵyttaýǵa bolady», dedi Qusbekov.
Sondaı-aq depýtat bul bastamada mindetti talap retinde jaryq ótkizýi keminde 70 paıyz bolý kerek ekenin basa aıtty. Ol Qyrǵyzstan men О́zbekstanda mundaı bastama sátti júzege asqanyn mysalǵa keltirdi. Sonymen qatar, Qusbekov kólik sanatyna qaraı (ekonom, bıznes, premıým) dıfferensıaldy tarıfter engizýdi de usyndy.
Májilis depýtattarynyń usynysynan keıin bul másele Ortalyq kommýnıkasııalar qyzmetinde ótken brıfıngte kóterildi. Onda Ishki ister mınıstrliginiń Ákimshilik polısııa komıteti tóraǵasynyń orynbasary Alekseı Mılıýk pikir bildirdi:
«Bul másele shynymen kóterildi. Áli de aýqymdy talqylaý ótedi. Depýtattardyń bul bastamasyn jalpy qoldaımyz ba, joq pa – sony sheshýimiz kerek», dedi ol.
Aıta keteıik, Qazaqstanda aldyńǵy terezelerdi qarańǵylaýǵa tyıym 2010 jyly engizilgen. Ol kezde bul sheshim jol erejelerin buzǵan júrgizýshilerdi jáne jolaýshylardy anyqtaý qıynǵa soqqanyna baılanysty qabyldanǵan edi.
О́tken jyly IIM vıse-mınıstri Marat Qojaev bul másele qaıta qaralyp jatqanyn aıtqan. Ol Keden odaǵynyń tehnıkalyq reglamentinde aldyńǵy áınekterge belgili bir mólsherde tonırovka jasaýǵa ruqsat bar ekenin atap ótken bolatyn.
Májilis depýtattarynyń bastamasy qoǵamda qyzý talqylaý týdyryp otyr. Eger usynys qabyldansa, bul bıýdjetke qosymsha tabys ákelýimen qatar, kólik júrgizýshilerine belgili bir erkindik bermek. Alaıda IIM bul sheshimniń qaýipsizdikpen tikeleı baılanysty ekenin eskertip otyr. Aldaǵy ýaqytta bul másele ashyq qoǵamdyq jáne memlekettik talqylaýdan keıin ǵana naqty sheshimin tappaq.
Araılym MYRZAHAN,
EUÝ 2 kýrs stýdenti
