Aıdyn Rahymbaevtyń aıtýynsha, onyń úlken naǵashy ájesi asharshylyq pen saıası qýǵyn-súrgin jyldarynda otbasy músheleriniń arasynan aman qalǵan jalǵyz jan bolǵan.
- Asharshylyqta ájem ǵana tiri qalǵan, – dedi ol.
Kásipkerdiń sózinshe, 1928 jyly olardyń otbasy kámpeskege ushyraǵan. Sol ýaqytta bastalǵan alǵashqy tárkileý tolqynynda onyń úlken naǵashy ájesiniń ákesi jáne eki baýyry «tizimge» ilikken. Ortanshy aǵasynyń búkil maly tárkilense, kenjesi otbasymen birge shekara asyp, qashýǵa májbúr bolǵan. Aıdyn Rahymbaevtyń arǵy atasy, aǵaıyndylardyń úlkeni, bılikke qarsylyq bildirgeni úshin tutqyndalyp, Zyrıanovsk shahtalaryna jer aýdarylǵan. Ol jaqtan oralmaǵan.
- Aýylda qalǵan týystardyń basym bóligi ashtyqtan qyryldy. Tek úlken naǵashy ájem ǵana aman qalyp, bizdiń áýlettiń urpaǵy jalǵasty, – dep atap ótti Rahymbaev.
Aıdyn Rahymbaev tarıhı málimetterge súıene otyryp, asharshylyq jyldary qazaq halqynyń 40-50 paıyzy – 1,5-2,5 mıllıonǵa jýyq adam qyrylǵanyn eske salady. Onyń aıtýynsha, sol náýbet jyldary tutas aýyldar men rýlar joıylyp, kóptegen qazaq otbasylary urpaqsyz qalǵan.
Kásipker osy oqıǵaǵa baılanysty bylaı dedi:
- Bul joǵalǵan mıllıondar – tek sandar emes, olar – dúnıege kelmegen ǵalymdar, ustazdar, dárigerler, ákeler men analar. Bul – halqymyzdyń aıyrylyp qalǵan balama bolashaǵy, – dedi Aıdyn Rahymbaev.
Ol 31 mamyr qarsańynda #31mamyr heshtegimen kópshilik áleýmettik jelilerde óz otbasy tarıhymen bólisip jatqanyn atap ótti.
- Sizder de óz áýletińizdiń tarıhymen – estelikter men fotosýretter arqyly bólise alasyzdar. Biraq agressııadan bas tartyp, bul kúndi ótkenge taǵzym, ata-babalarymyzdyń rýhyna qurmet kórsetý kúni retinde ótkizgen jón. Bul – balalarymyzǵa shejiremizdi amanattap tapsyratyn kún, – dedi kásipker.
Aıdyn Rahymbaev eske alý kúni ótken oqıǵalardy qurmetpen eske alyp, ótken tarıhty umytpaý – ár urpaqtyń paryzy ekenin atap ótti.
